मानव अधिकार निगरानी समूहका सदस्यलाई मानव अधिकार सम्बन्धी तालिम

  ०७७ असार १६ गते

अनौपचारिक क्षेत्र सेवा केन्द्र (इन्सेक) को समन्वय,सहकार्य र बेलका नगरपालिकाको सहयोगमा मानव अधिकार निगरानी समूहले आयोजना गरेको पाँच दिने मानव अधिकार सम्बन्धी तालिम असार १६ गते सम्पन्न भएको छ ।

मानव अधिकारको राष्ट्रिय तथा अन्तर्राष्ट्रिय सवाल, नीतिगत व्यवस्था, भइरहेका प्रयासका बारेमा प्रदेश १ सामाजिक विकास मन्त्रालयका मानव अधिकार विज्ञ कोषराज न्यौपानेले सहभागीहरूलाई प्रशिक्षण दिनु भएको छ ।

मानव अधिकारको परिचय र जिल्लाको मानव अधिकारको अवस्थाका बारेमा इन्सेक जिल्ला प्रतिनिधि भरत खड्का, मानव अधिकार सम्बन्धी कानुनी व्यवस्था र उजुरी प्रकृयाका बारेमा अधिवक्ता सुरेन्द्र बस्नेत, सुशासनमा मानव अधिकार युवा अभियन्ता विकास बन्जरा, महिला तथा बालबालिका अधिकारकर्मी तीर्थ पराजुली र प्रशासनिक क्षेत्रमा मानव अधिकारका बिषयमा नगरपालिकाका प्रमुख प्रशासकीय अधिकृत धर्मानन्द जोशीले प्रशिक्षण दिनु भएको थियो । तालिममा निगरानी समूहका काम,कर्तव्य र अधिकारका सवालमा इन्सेक प्रदेश १ कार्यक्रम अधिकृत वागमता कट्टेलले सहजीकरण गर्नु भएको थियो ।

बेलका नगरपालिकाका मेयर दुर्गाकुमार थापाले कानुनी शासन स्थापना भए मात्र व्यक्तिको मानव अधिकार सुरक्षित रहने बताउनुभयो । उहाँले मानव अधिकारमैत्री राज्य व्यवस्था बनाउन सकेमात्र समृद्ध नेपाल र सुखी नेपालीको कल्पना गर्न सकिने बताउनुभयो ।

बेलकानगर क्षेत्रका मानव अधिकार निगरानी समूहका सदस्यलाई लक्षित गरी असार १२ गतेदेखि आयोजना गरिएको तालिममा प्रभावकारी भएको बेलका नगरपालिकाका मेयर दुर्गाबहादुर थापाले बताउनुभयो । तालिममा २० जनाको सहभागिता रहेको थियो ।

Photo 20200629

भरत खड्का