इन्सेक गतिविधिहरू

जैमिनी नगरपालिकाका प्रमुख इन्द्रराज पौडेलले सम्वृद्ध समाज निर्माणको लागि मानव अधिकारको संरक्षण र सम्वर्द्धन हुनु आवश्यक रहेको बताउदैँ यसप्रति आफू प्रतिबद्ध रहेको बताएका छन् ।

अनौपचारिक क्षेत्र सेवा केन्द्र (इन्सेक) बागलुङले जैमिनी नगरपालिकामा मङ्सिर २ गते आयोजना गरेको परियोजना परिचयात्मक तथा मानव अधिकार समूह गठन कार्यक्रममा उनले यस्तो प्रतिबद्धता जनाएका  हुन् ।

प्रमुख पौडेलले जैमिनी नगरपालिकामा हुने मानव अधिकार हनन्का घटना न्यूनिकरण गर्नको लागि, नगरपालिकाको तर्फबाट सञ्चालित कार्यक्रम र योजनाहरू मानव अधिकारमैत्री बनाउन इन्सेकले गठन गरेको मानव अधिकार समूह सहयोगी हुने  बताए ।

नगरपालिकाकी उपप्रमुख लिला रानाले मानव अधिकार समूहलाई नगरपालिकाको शिक्षा, स्वास्थ्य, खाद्य र आवासमा मात्र नभएर सबै प्रकारका मानव अधिकारका विषयवस्तु माथि जागरण र चेतना ल्याउने काम गर्न आग्रह गरेकी छन् ।

उनले इन्सेकले ल्याएको परियोजनालाई सफल पार्नको लागि जैमिनी नगरपालिकाको तर्फबाट सहयोग गरिने  बताएकी छन् ।

सो कार्यक्रममा १३ सदस्यीय मानव अधिकार समूहसमेत गठन गरिएको छ । समूहको सदस्यमा खगेश्वरी शर्मा, सरिता थापा, लालमाया बिक, भेषराज ढकाल, कृष्ण हमाल, राजेश नेपाली, किरण शर्मा, लालहरी अधिकारी, ठगेन्द्र थापा, यनु थापा, धनबहादुर माझी, कोपिला छन्त्याल र मैनुदिन मिया रहेका छन् ।

मानव अधिकार संरक्षण र सम्वर्द्धनका लागि राज्यको जबाफदेहिता तथा जनताको सहभागिता अभिवृद्धिको लागि मानव अधिकार समूहले काम गर्ने समूहका सदस्यहरूले प्रतिबद्धता व्यक्त गरेका छन् ।

आगामी बैठकबाट समूहका सदस्यहरू बिचमा कार्य विभाजन गर्ने सदस्यहरूले बताएका छन् ।

सिर्जना पन्त