भूकम्प पछिको राहत तथा पुनःनिर्माणको सवालमा सार्वजनिक सुनुावइ 

  ०७५ मङ्सिर ७ गते

अनौपचारिक क्षेत्र सेवा केन्द्र (इन्सेक) सिन्धुली र जिल्लास्तरीय मानव अधिकार सञ्जाल सिन्धुलीको संयुक्त आयोजनामा मङ्सिर ६ गते कमलामाई नगरपालिकाको भिमानमा भूकम्पपछिको राहत तथा पुनःनिर्माणको सवालमा सार्वजनिक सुनुावइ कार्यक्रम सम्पन्न गरिएको छ ।

कार्यक्रममा भूकम्प पीडितका गुनासो सम्बोधन गर्दै कमलामाई नगरपालिका उपमेयर मञ्जु देवकोटाले पुसमा हुने परिषद्बाट बजेट नै छुट्याएर ऐलानी जग्गाको लगत लिने र स्थायी लालपूर्जा वितरणको लागि प्रक्रिया अगाडि बढाइने बताइन् ।

उनले लालपूर्जाको विषयमा प्रदेश तथा सङ्घीय सरकारसँग बहस भइसकेको र काम अगाडि बढाउन काम गर्ने सहमति बमोजिम काम गर्न लागिएको बताइन् । मापदण्ड अनुसार घर बनाएर किस्ता नपाएकाहरूले तत्काल पाउने गरी काम अगाडि बढाइने तथा सर्वेक्षणमा छुटेका नगरका वडाहरूमा पुनः सर्वेक्षण समेत गरिने उनले बताइन् ।

स्थानीय डोरप्रसाद सुवेदीले ऐलानी जग्गामा घर बनाएका पीडितले दोस्रो र तेस्रो किस्ता रकम पाउन नसकेको गुनासो गरेका छन् । उनले ऐलानी जग्गामा बसोबास गरेका पीडितले घर बनाउँदा पनि पैसा नपाउने र नबनाउँदा पनि राज्यले समस्यामा पारेको आरोप लगाए ।

कार्यक्रममा स्थानीय सरकारका प्रतिनिधिलाई प्रश्न गर्दै अर्का सहभागी अम्बर भण्डारीले भने–‘ऐलानी जग्गामा लामो समयदेखि बसोबास गर्दै आएका हामी नेपाल सरकारका जनता हौँ ? या होइनौँ ? जबाफ चाहियो ।’

कार्यक्रममा गुनासो राख्दै विसं २०१८ सालदेखि ऐलानीमा बसोबास गरेका भिमानबासीलाई राज्यले नै उपेक्षा गरेको स्थानीय घनेन्द्र कार्कीले गुनासो गरेका छन् ।

निवृत शिक्षक समेत रहेका कार्कीले राज्यले नै बसोबासमा नागरिकलाई उपेक्षा गर्नुले मानव अधिकारको समेत हनन् भएको भन्दै बोलिदिनका लागि इन्सेकसमक्ष आग्रह गरे ।

कमलामाई नगरपालिका–९ का वडाध्यक्ष देवराज पौडेल र नगरपालिका–१० का वडाध्यक्ष रामहरी ढुङ्गेलले भूकम्प पीडितको राहत तथा पुनःनिर्माणको अवस्थाको बारेमा जानकारी दिँदै नागरिकका गुनासो सम्बोधन गर्न, पुनःनिर्माणमा सहजीकरण गर्न र लाभग्राहीको सूचीमा आएका लाभग्राहीको सम्झौता गर्न आपूmहरू तयार रहेको बताए ।

विमला पाण्डे