भूकम्पपीडितको राहत तथा पुनर्निमाण विषयक सार्वजनिक सुनुवाइ सम्पन्न

  ०७४ पुस ७ गते

अनौपचारिक क्षेत्र सेवा केन्द्र (इन्सेक) मकवानपुरले पुस ६ गते हेटौँडामा भूकम्पपीडितहरूको राहत तथा पुनर्निर्माण विषयक सार्वजनिक सुनुवाइ कार्यक्रम सम्पन्न गरेको छ ।

कार्यक्रममा जिल्ला समन्वय समिति मकवानपुरका जिल्ला आयोजना कार्यान्वयन इकाई र भूकम्पीय आवास कार्यक्रमका सामाजिक विकास विशेषज्ञ इञ्जिनियर अञ्जय कँडेलले पुनर्निर्माण प्राधिकरणको तर्फबाट ५ सय ६६ भूकम्पपीडित र गैरसरकारी संस्थाको तर्फबाट ७ सय ७ भूकम्पपीडित गरी १ हजार २ सय ७३ जनाले घर बनाउन तेस्रो किस्ता बुझेर लगिसकेको बताए ।

इञ्जिनियर कँडेलले मकवानपुरमा ३१ हजार ८ सय १७ जना लाभग्राही रहेकोमा हालसम्म २३ हजार ५ सय ८० जना लाभग्राहीसँग मात्र अनुदान सम्झौता भएको बताए ।

सुरूमा मकवानपुरमा ३० हजार २ सय ३८ जना मात्र लाभग्राही थिए । गुनासो फर्स्यौटपछि १ हजार ५ सय ७९ लाभग्राही थपिएको इञ्जिनियर कँडेलले बताए ।

टिष्टुङ र आग्राका भूकम्पपीडितहरूको आवास भवन टिरयफण्डमार्फत राडो नेपालले निर्माण गरिरहेको छ । उक्त संस्थाले नै लाभग्राहीहरूसँग अनुदान सम्झौता गरेको छ ।

अधिकांश भूकम्पपीडितहरू ऐलानी जग्गामा बसोवास गर्दै आएकाले उनीहरूसँग घर बनाउनको निम्ति अनुदान सम्झौता हुन सकेको छैन ।

वर्षौँदेखि बसोवास गर्दै आएको घर/जमीन उनीहरूको नाममा नभएकाले भूकम्पपीडितहरूसँग सम्झौता हुन नसकेको जनाइएको छ ।

कार्यक्रममा सहरी विकास मन्त्रालय जिल्ला आयोजना कार्यान्वयन ईकाई मकवानपुरका प्रमुख सुदिप आचार्यले प्राविधिकहरू गाउँ/गाउँमा रहेको जानकारी गराए । "विगतमा प्राविधिकको अभाव थियो । अहिले छैन ।"-उनले भने ।

प्रताप विष्ट