भुकम्प प्रतिरोधी घर बनाउन ऐलानीले रोक्दैनः मेयर खत्री

  ०७४ भदौ १५ गते

कमलामाई नगरपालिकाका भुकम्पपीडितले ऐलानी जग्गा भएकै कारण घर बनाउनबाट वञ्चित हुन नपर्ने मेयर खड्ग खत्रीले बताएका छन् ।

उनले केही समय अघिसम्म बाटो सार्वजनिक नभएका कारण र ऐलानी जग्गा भएका कारण आएको समस्या जनप्रतिनिधिहरू आए पछि समाधान भएको बताए ।

photo20170901sindhuli (3)

अनौपचारिक क्षेत्र सेवा केन्द्र (इन्सेक) र जिल्ला स्तरीय मानव अधिकार सञ्जाल सिन्धुलीको संयुक्त आयोजनामा कमलामाई नपा-५ को सिलामेमा भदौ १५ गते भएको सार्वजनिक सुनुवाइ कार्यक्रममा उनले यस्तो कुरा बताएका हुन ।

मेयर खत्रीले नक्सापासमा इञ्जिनियरले पैसा खाने गरेको भन्दै नागरिकले गरेको गुनासोमा भूकम्प पीडितले नक्सा बनाउँदा र पास गर्दा नगरपालिकाले पैसा नलिने गरेको बताए । उनले यदि प्राविधिकहरूले त्यसो गरेको पाइएमा आफुलाई जानकारी भएमा तत्काल कारबाही गर्ने समेत बताए ।

photo20170901sindhuli (2)

खत्रीले भूकम्प पीडित नागरिकको गुनासोलाई सम्बोधन गर्दै परापूर्वकालदेखि ऐलानी जग्गामा बसोबास गरेका र अन्यत्र घर बनाउने ठाउँ नभएका पीडितलाई समेत नगरपालिकाले बाटो खोलिदिएको बताए ।

उनले पुनर्निर्माण प्राधिकरण र नगरपालिकाको समन्वयमा गाउँस्तरको मुचुल्का र वडा प्रतिनिधिहरूबाट सिफारिस भएमा घर बनाउन नरोकिने बताए । 'तर, भूकम्प प्रतिरोधि घर भने बनाउनै पर्छ ।'-उनले भने ।

नागरिकहरूका गुनासा सम्बोधन गर्दै पुनर्निर्माण प्राधिकरण सिन्धुलीका प्रमुख बासुदेव हुमागाईंले प्राविधिक बिना बनिसकेका घरहरूका हकमा प्राविधिक जाँच गराएमा अनुदानबाट नागरिकलाई नरोकिने बताए ।

उनले बनिसकेको घर प्राविधिकले भूकम्प प्रतिरोधी छ भनी सिफारिस गरेमा ३ लाख रुपियाँ पाउनबाट नरोकिने बताएका छन् ।

photo20170901sindhuli (1)

हुमागाईका अनुसार जिल्लाका २८ हजार गुनासो प्राधिकरणले सम्बोधन गरिसकेकोमा ७ सय १९ घरधुरी लाभग्राही सूचीमा परेको, १ हजार ८ सय ३ घर मर्मत गर्नुपर्ने सूचीमा परेको र बाँकी घर सर्वेक्षण गर्नुपर्नेमा परेका छन् । यसका लागि र्सर्वेक्षणमा ५७ जना इञ्जिनियर खटाइएको उनको भनाई छ ।

वडा अध्यक्ष पूर्णबहादुर खड्काले भूकम्प पीडितका लागि वडाबाट गर्न सकिने सबै काम गरिएको बताए । नगरपालिका र सरकारको नीतिलाई अनुसरण गर्दै सेवा दिन कञ्जुस्याँइ नगरिने उनको भनाई छ ।

बिमला पाण्डे