नेपाल मानव अधिकार वर्ष पुस्तक प्रकाशन पूर्व अर्धवार्षिक समीक्षा सम्पन्न

  ०७६ असार १३ गते

अनौपचारिक क्षेत्र सेवा केन्द्र (इन्सेक)को आयोजनामा नेपाल मानव अधिकार वर्ष पुस्तक २०२० को प्रकाशन पूर्व अर्धवार्षिक समीक्षा असार १२ गते लिबाङमा सम्पन्न भएको छ ।

इन्सेक जिल्ला प्रतिनिधि माधव ओलीले ६ महिनाको अवधिमा सङ्कलन गरेका नागरिक तथा राजनीतिक अधिकारसँगसम्बन्धित ६ ओटा, राज्य पक्षबाट धम्की एउटा, महिला अधिकारको एउटा, बाल अधिकार एउटा र अभिव्यक्ति स्वतन्त्रताको एक गरी १० ओटा घटनाको विवरण प्रस्तुत गरेका थिए ।
कार्यक्रममा जिल्ला समन्वय समिति रोल्पाका प्रमुख राजबहादुर बुढाले आफ्नो अधिकारको प्रयोग गर्दा कर्तव्यको पनि ख्याल गर्नुपर्ने बताए ।

इन्सेकका साधारण सदस्य घनश्याम आचार्यले विगतदेखि नै इन्सेकले राज्य र विद्रोही पक्षबाट हुने मानव अधिकार उल्लङ्घनका घटनालाई निष्पक्ष रूपमा विश्लेषण गरी अभिलेखिकरण गरेकाले अहिलेपनि राज्यलाई सचेत गराउने र संविधान मान्दैनौ भन्ने पक्षबाट हुने मानव अधिकार हनन्का घटनालाई अभिलेख गर्ने बताए ।

देशमा राजनीतिक परिवर्तन गर्न रोल्पाको महत्वपूर्ण भूमिका भएता पनि नेता र नेतृत्वको व्यवहार परिवर्तन हुन नसकेको उनको भनाई छ । रोल्पाका जनप्रतिनिधिले नमूना काम गरेर उदाहरण प्रस्तुत गर्नुपर्नेमा उनले जोड दिए । कार्यक्रमका सहभागिहरूले केही घटना छुटेकाले समेट्न सुझाव दिएका थिए ।

photo20190628rolpa
माधवकुमार ओली