नेपाल मानव अधिकार वर्ष पुस्तक २०२० को प्रकाशन पूर्व अर्धवार्षिक समीक्षा सम्पन्न

  ०७६ असार ११ गते

नेपाल मानव अधिकार वर्ष पुस्तक २०२० का लागि रुकुम पश्चिममा २०१९ जनवरीदेखि हालसम्म सङ्कलन गरिएका मानव अधिकार उल्लङ्घन र ज्यादतीका घटनाहरूको प्रकाशन पूर्व अर्धवार्षिक समीक्षा असार ९ गते मुसिकोट खलङ्गामा सम्पन्न भएको छ ।

Photo20190626Rukum (1)

कार्यक्रममा इन्सेक जिल्ला प्रतिनिधि मनिषा केसीले यस अवधिमा सङ्कलन गरेका २५ ओटा मानव अधिकार उल्लङ्घन र ज्यादतीका घटनाहरू प्रस्तुत गरेकी थिइन ।

जसमा धम्की कुटपिट अन्य पक्षबाट एक, राज्य पक्षबाट एक, गिरफ्तारी ६, बालिका बलात्कार तथा यौन दुर्व्यवहार पाँच, घरेलु हिंसा र कुटपीट चार, महिला बलात्कार तथा यौन दुर्व्यवहार तीन, मानव बेचबिखन एक र बहुविवाहका चार ओटा घटना रहेका छन् ।

Photo20190626Rukum (2)

कार्यक्रममा जिल्ला प्रशासन कार्यालय रुकुम पश्चिमका नायव सुब्बा बलबहादुर केसीले प्रहरीबाटै पुष्टि गरेर घटनाहरू सङ्कलन गरेकोले यी सबै विश्वसनीय भएको बताए ।

जिल्ला प्रहरी कार्यालय रुकुम पश्चिमका इन्स्पेक्टर नविन थापामगरले यसरी घटनाहरूको पुनःपुष्टिका लागि कार्यक्रम राख्दा थप भरपर्दो र विश्वसनीय हुने र प्राप्त सुझावलाई समेत समावेश गर्न सहज हुने बताए ।

Photo20190626Rukum (3)

पछिल्लो समय जिल्लामा मदिराको व्यापार व्यवसाय र सेवनमा कडाइ भएपछि घरेलु हिंसा र अन्य आपराधिक घटनाहरूमा कमी आएको उनले जानकारी दिए ।

जिल्ला सरकारी वकिल कार्यालयका सहायक जिल्ला न्यायधिवक्ता विनोद पौडेलले इन्सेकले गोपनीयताको हकलाई सुनिश्चित गर्न विशेषखालका पीडितको नामहरू गोप्य राख्नु राम्रो भएको प्रतिक्रिया दिए ।

Photo20190626Rukum (4)

नेकपा रुकुम पश्चिमका जिल्ला सचिव विमलकुमार पुनले इन्सेकले पीडितका लागि सहयोग गर्दै आएकोमा प्रशंसा गर्दै सक्रियता कायमै राख्नुपर्ने बताए ।

नेपाली कांग्रेस रुकुम पश्चिमका सचिव गोरखबहादुर केसीले सत्यतथ्यको उजागर गर्दै यस्ता घटनाको कमी ल्याउन सचेतनामूलक कार्यक्रम समेत गर्नुपर्ने सुझाव दिए ।

गैरसरकारी संस्था महासङ्घ नेपाल रुकुम पश्चिमका अध्यक्ष नारायणकुमार शाहले देशमा ठूलो परिवर्तन भैसक्दा पनि इन्सेकको यो ढाँचा पूरानो भएको भन्दै सबैको मानव अधिकारको रक्षा गर्न केही नयाँपन दिनुपर्नेमा जोड दिए ।

Photo20190626Rukum (5)

जिल्ला बार एकाई रुकुम पश्चिमका अध्यक्ष एक्कबहादुर पाण्डेले गोपनीयता कायम राख्नुपर्ने कानुनी व्यवस्थालाई इन्सेकले पालना गरेको भन्दै खुसी व्यक्त गरे ।

नेपाल पत्रकार महासङ्घ रुकुमका अध्यक्ष गणेश चिन्तनले एउटा कुटपिटको घटना छुटेको भन्दै उक्त घटनालाई पनि समेट्न सुझाव दिए ।

त्यस्तै पत्रकार मेगराज खड्काले प्रायः बलात्कारका मुद्दामा अदालतले निर्दोष सावित गरेपछि उक्त आरोप लगाउने महिलाको नाम सार्वजनिक गर्नुपर्ने बताए ।

जसले गर्दा उक्त महिलाले अर्कोपटक अर्को व्यक्तिलाई त्यस्तो आरोप लगाउन र अनावश्यक पैसाको बार्गेनिङ गर्ने समस्याको समाधान हुने उनको भनाई छ ।

मनिषा केसी