नेपाल मानव अधिकार वर्ष पुस्तक २०१९ को प्रकाशन पूर्व समीक्षा कार्यक्रम सम्पन्न

  ०७५ कात्तिक ३० गते

नेपाल मानव अधिकार वर्ष पुस्तक २०१९ का लागि अभिलेखित घटनाहरूको प्रकाशन पूर्व वार्षिक समीक्षा कार्यक्रम कात्तिक ३० गते महेन्द्रनगरमा सम्पन्न गरिएको छ ।

वार्षिक समीक्षा कार्यक्रममा इन्सेक जिल्ला प्रतिनिधि कोमलनिरन्जन भाटले वर्ष पुस्तकका लागि सन् २०१८ जनवरीदेखि हालसम्म सङ्कलन गरेका १ सय २० ओटा मानव अधिकार उल्लङ्घन तथा ज्यादतीका घटना प्रस्तुत गरेका थिए ।

हालसम्म कञ्चनपुर जिल्लामा ४५ ओटा घरेलु हिंसा, आठ ओटा हत्या, २१ जना घाइते, १२ ओटा बलात्कार, दुई ओटा जातीय विभेद, दुई ओटा मानव बेचबिखन, तीन ओटा यातना र १९ ओटा सम्पति क्षतिसहित १ सय २० ओटा घटना अभिलेख गरिएको इन्सेक प्रतिनिधि भाटले बताए ।

जिल्ला समन्वय समिति कञ्चनपुरका प्रमुख फैरू तामाङले मानव अधिकार उल्लङ्घनका घटनाहरू न्यूनीकरण गर्नका लागि सरकारले छिटो छरितो सेवा प्रवाह गर्नुपर्ने बताए । यसका साथै इन्सेकले मानव अधिकार संरक्षणमा मार्गदर्शकको रूपमा काम गरेको बताए ।

जिल्ला समन्वय अधिकारी नारायणप्रसाद पाण्डेयले मानव अधिकारको क्षेत्रमा इन्सेकले महत्वपूर्ण भूमिका खेलेको बताउँदै मानव अधिकार उल्लङ्घनका घटनाहरूमा संलग्नहरूलाई खबरदारी गर्नुका साथै मानव अधिकार शिक्षासम्बन्धी सचेतनामुलक कार्यक्रम गर्न आग्रह गरेका छन् ।

नागरिक समाज कञ्चनपुरकी सहसंयोजक पुनमसिंह चन्दले स्थानीय तहसम्म गएर मानव अधिकार उल्लङ्घनका घटनाहरूमा सङ्कलन गर्न इन्सेकलाई सुझाव दिएकी छन् ।

कोमलनिरन्जन भाट