इन्सेक गतिविधिहरू

नेपाल मानव अधिकार वर्ष पुस्तक-२०१८ का लागि रोल्पा, कालिकोट र अछाम जिल्लामा सङ्कलित घटनाहरूको प्रकाशन पूर्व सरोकारवाला निकायबिच समीक्षा गरिएको छ ।

इन्सेक रोल्पा जिल्ला प्रतिनिधि माधवकुमार वलीका अनुसार कार्यक्रममा सन् २०१७ भरी जिल्लामा सङ्कलन गरिएका मानव अधिकार उल्लङ्घन र ज्यादतीका १९ ओटा घटनाका बारेमा समीक्षा गरिएको थियो ।

सङ्कलित घटनाहरूमा राजनीतिक अधिकारसँग सम्बन्धित आठ, अमानवीय व्यवहार एक, महिला अधिकारसँग सम्बन्धित १० ओटा रहेका छन् ।

कार्यक्रममा मानव अधिकारकर्मी खेम बुढाले जिल्लाका मानव अधिकार उल्लङ्घनसँग सम्बन्धित घटनाहरू अभिलेखीकरण गर्ने इन्सेकको यो कार्यले वर्षभरी हुने घटनाहरू सार्वजनिक हुने बताए । यस्ता कार्यमार्फत जिल्लामा लुकाउन खोजेका घटना पनि उजागर हुने धारणा अधिकारकर्मी बुढाले राखे ।

कार्यक्रममा नेकपा एमाले रोल्पाका सचिवालय सदस्य मनसिङ डाँगीले स्थानीय निर्वाचनपछि पनि मानव अधिकार उल्लङ्घनका घटना बढेकाले अहिले पनि त्यसतर्फध्यान दिनुपर्ने औँल्याए ।

इन्सेक कालिकोट जिल्ला प्रतिनिधि कालीबहादुर मल्लका अनुसार अनौपचारिक क्षेत्र सेवा केन्द्र (इन्सेक) कालिकोटको आयोजनामा मानव अधिकार वर्ष पुस्तक-२०१८ का लागि जिल्लामा सङ्कलन गरिएका मानव अधिकार उल्लङ्घन र ज्यादतीका घटनाहरूको वार्षिक पूर्व समीक्षा कार्यक्रम जिल्ला सदरमुकाम मान्ममा पुस ५ गते सम्पन्न भएको छ ।

कार्यक्रममा इन्सेक प्रतिनिधि मल्लले एक वर्षमा ३६ ओटा मानव अधिकार उल्लङ्घन र ज्यादतीका घटना सरोकारवाला निकायबिच प्रस्तुत गरेका थिए ।

नागरिक तथा राजनीतिक अधिकारतर्फ गोली प्रहार गरी राज्यबाट एक जनाको हत्या भएको सार्वजनिक गरिएको छ । कुटपिट तथा धम्की र घाइते गरी राज्य पक्षबाट तीन, विष्फोटक पदार्थ र गोली प्रहारबाट आठ जना घाइते र अपमानजक व्यवहारबाट एक जना पीडित भएको जानकारी गराएको छ ।

त्यस्तै बालविवाहका तीन, बोक्सीको आरोपमा अमानवीय व्यवहार एक, बहुविवाह तीन, बलात्कार, यौन दुर्व्यवहार तीन जना र पारिवारिक हिंसाका ६ जना गरी जम्मा ३६ ओटा मानव अधिकार उल्लङ्घन र ज्यादतीका घटना भएको इन्सेक जिल्ला प्रतिनिधि कालीबहादुर मल्लले सार्वजनिक गरेका हुन् ।

कार्यक्रममा खाँडाचक्र नगरपालिकाका उपप्रमुख विजया विष्टले इन्सेकले लामो समयदेखि महत्वपूर्ण दस्तावेजको रूपमा प्रकाशन गर्दै आएको मानव अधिकार वर्ष पुस्तकले पीडितलाई न्याय र पीडकलाई कारबाही गर्न सघाउ पुर्‍याएको बताइन् ।

इन्सेक अछाम जिल्ला प्रतिनिधि शिवराज ढुङ्गानाका अनुसार अनौपचारिक क्षेत्र सेवा केन्द्र (इन्सेक) ले अछाम जिल्लामा नेपाल मानव अधिकार वर्ष पुस्तक-२०१८ का लागि सङ्कलित मानव अधिकार उल्लङ्घन तथा ज्यादतीका घटनाहरू प्रकाशन पूर्व वार्षिक समीक्षा सम्पन्न गरिएको छ ।

सदरमुकाम मङ्गलसेनमा पुस ५ मा आयोजित समीक्षामा सहभागीहरूले इन्सेकले जिल्लामा मानव अधिकारको क्षेत्रका घटनाहरू अभिलेखीकरण गरेर मानव अधिकारको अवस्था झल्काएको भनाई राखे ।

कार्यक्रममा इन्सेक प्रतिनिधि ढुङ्गानाले सन् २०१७ को जनवरीदेखि सङ्कलन गरिएका पाँच ओटा बलात्कार, एउटा मानव बेचबिखन, तीन ओटा हत्यालगायतका घटना प्रस्तुत गरेका थिए ।

कार्यक्रममा मङ्गलसेन नगरपालिकाका न्यायिक समिति संयोजक एवम् उपमेयर सरिता उपाध्यायले जिल्लामा पुरूष भन्दा महिलाको अधिकार बढी हनन् भएको भन्दै सरकारी र गैरसरकारी क्षेत्रमा यसमा केन्द्रीत हुनआग्रह गरिन् ।

उपमेयर उपाध्यायले हरेक नागरिकमा मानव अधिकारको सचेतना जागृत सहित कानुनी प्रक्रिया र निकायको बारेमा जानकारी गराउन आवश्यक रहेको भनाई राखिन् ।

सहायक प्रमुख जिल्ला अधिकारी तुलबहादुर काउचाले राज्यका हरेक संयन्त्रहरू मानव अधिकार प्रत्याभूत गर्न केन्द्रीत भएको बताए । उनले मानव अधिकारका क्षेत्रमा इन्सेकले गरेको कामले सरकारका संयन्त्रलाई मानव अधिकारको प्रत्याभूत गर्न सहयोग हुने भनाई राखे ।

अनलाइन डेस्क