नेपाल मानव अधिकार वर्ष पुस्तक २०२१ प्रकाशन पूर्व वार्षिक समीक्षा सम्पन्न

  ०७७ पुस ७ गते

जिल्लामा नेपाल मानव अधिकार वर्ष पुस्तक २०२१ प्रकाशन पूर्व वार्षिक समीक्षा कार्यक्रम पुस ७ गते सम्पन्न भएको छ ।

अघिल्लो वर्षको तुलनामा महिला र बालबालिकामाथि भएका घटनामा वृद्धि भएको वर्ष पुस्तक २०२१ का लागि सङ्कलित घटनाहरूले देखाएको छ ।

इन्सेक अभिलेख अनुसार सन् २०२० जनवरीदेखि ११ महिनाको अवधिमा ६५ जना बालिका र ७६ महिला बलात्कार तथा यौन दुर्व्यवहार घटनामा पीडित भएको उल्लेख छ ।

सोही अवधिमा अघिल्लो वर्ष १ एक २ जना पीडित भएको इन्सेक सुनसरीले उल्लेख गरेको छ ।

यस वर्ष राज्यपक्षबाट सात जना पुरूष कुटपिटको घटनामा पीडित भएको इन्सेकले अभिलेख गरेको छ । अन्य पक्षबाट ६ ओटा हत्याका घटना, बलात्कारका १ सय ६ ओटा, बलात्कार प्रयासका १२ ओटा घटना इन्सेकले अभिलेख गरेको छ ।

समीक्षा कार्यक्रममा सशस्त्र प्रहरीका अरूण पाण्डेले मानव अधिकार उल्लङ्घन र ज्यादतीका घटना न्यूनीकरणका लागि सचेतनामुलक कार्यक्रम आवश्यक रहेको बताउनु भयो ।

पाण्डेले खुल्ला सीमाका कारणले मानव बेचविखनको समस्या रहेकाले त्यसमा सशस्त्र प्रहरीले गरेको राम्रो कामको पनि अभिलेखीकरण गर्न आवश्यक रहेको बताउनु भयो ।

अधिकारकर्मी नविनचन्द साहले जिल्लामा महिला बालबालिकामाथि हुने हिंसा न्यूनीकरणका लागि स्थानीय तहले बालबालिका र महिलालाई प्राथमिकतामा राखी कार्यक्रम ल्याउन आवश्यक रहेको बताउनु भयो ।

विष्णुदेव यादवले मानव अधिकार वर्ष पुस्तक द्वन्द्वकालीन घटनाको अनुसन्धानमा सहयोगी बनेको बताउँदै इन्सेकको अभिलेख र प्रतिवेदन निकै महत्वपूर्ण रहेको बताउनु भयो ।

मानव अधिकार समूहका भोक्राहा पूर्व अध्यक्ष शोभा मेहताले कोभिड–१९ महामारीपछि मानव अधिकार हननका घटना बढेको भन्दै यस वर्ष स्वास्थ्यका अधिकारका विषयलाई प्राथमिकता दिन आग्रह गर्नुभयो ।

सशस्त्र प्रहरीका इन्स्पेक्टर पूर्णबहादुर दाहालले इन्सेकले  मानवअधिकारको संरक्षणमा महत्वपूर्ण भूमिका खेलेको भन्दै मानव अधिकार वर्ष पुस्तक नेपालको मानव अधिकारको यथार्थ चित्रण भएको बताउनु भयो ।

उहाँले मानिसको सोच र मानसिकता परिर्वतन नभएसम्म समाज परिर्वतन नहुने भएकाले जनता र सरकार दुवैले अधिकारसगैं कर्तव्य निर्वाह गर्नुपर्ने बताउनु भयो ।

मानव अधिकार सञ्जाल सुनसरीका संयोजक रमेश भट्टराईले संयुक्त राष्ट्र सङ्घले जारी गरेका ६ ओटा महासन्धिहरूका आधारमा इन्सेकले घटना अभिलेखीकरण गरी वर्ष पुस्तक प्रकाशन गर्दै आएको बताउनु भयो ।

Photo 20211222 YB sunsari (1) Photo 20211222 YB sunsari (2) Photo 20211222 YB sunsari (3)

जयकृष्ण यादव