नागरिक समाज र सञ्चार जगतको सहकार्यले गुणस्तरीय विकास गराउँछ

  ०७७ असोज १ गते

इन्सेक नुवाकोटको आयोजनामा असोज १ गते विदुरमा नागरिक सङ्घसंस्थाका प्रतिनिधि र सञ्चारकर्मीहरूबीच छलफल भएको छ । विकासको लागि नागरिक समाज र सञ्चार जगतको सहकार्य विषयमा भर्चुअल माध्यमबाट छलफल भएको हो ।

कार्यक्रममा विकास निर्माण, नागरिक समाज, सञ्चार जगत र कोरोना भाइरसको प्रभावको बारेमा छलफल गर्दै कार्यक्रममा सहभागीहरूले नागरिक समाज र सञ्चार क्षेत्रको सहकार्यले गुणस्तरीय विकास गराउन मद्दत पुग्ने बताएका छन् । साथै नागरिक समाजका गतिविधिहरूलाई सञ्चारमाध्यमले बाहिर ल्याउने र त्यसमा उठेको प्रश्नहरूमाथि बहस हुनु पर्नेमा जोड दिएका थिए ।nuwakot civil+media photo

कार्यक्रममा गैरसरकारी संस्था महासङघका जिल्ला अध्यक्ष मीनकुमार केसीले विकासको लागि नागरिक समाज र सञ्चार जगतको सहकार्य अपरिहार्य रहेको उल्लेख गर्दै व्यवस्थित, सुरक्षित विकासको लागि सञ्चार जगतको थप सक्रियताको खाँचो रहेको बताउनुभयो ।

अध्यक्ष केसीले कोरोनाको समयमा नागरिक सङ्घसंस्थाहरूको सक्रियतामा केही कमी आए पनि सञ्चार जगतले भने आफ्नो भूमिका प्रभावकारी रुपमा निभाएको बताउनुभयो । उहाँले विकास भनेको नागरिकको चेतना, सचेतना जगाउन सक्नु पनि भएकोले त्यसमा सञ्चार जगतको भूमिका उल्लेखनिय रहेको बताउनुभयो ।

नेपाल पत्रकार महासङ्घका अध्यक्ष कपिलदेव खनालले विकासको लागि जिल्लाका सञ्चार क्षेत्रले नागरिक समाजसँग हातेमालो गरिरहेको बताउनुभयो ।

अध्यक्ष खनालले आमसञ्चारको भूमिका उच्च रहेको र विकासका गतिविधिहरूलाई प्रभावकारी बनाउनको लागि सञ्चार क्षेत्रको भूमिका थप सशक्त हुनको लागि के के गर्ने भन्ने विषयमा नागरिक समाजबाट स्पष्ट धारणा आए अझ सहज हुने बताउनुभयो ।

गैसस महासङ्घ बागमती प्रदेश समितिका सदस्य देवकी पौडेलले कोरोनाको कहरमा पनि सञ्चारमाध्यमले नागरिकहरूलाई सचेतना फैलाउने गहन जिम्बेवारी पुरा गरेको बताउनुभयो ।

कार्यक्रममा नेपाल बार एसोसिएसनका जिल्ला अध्यक्ष देवराज कँडेलले विकास, मानव अधिकार, नागरिकलाई सुसूचित गराउने जस्ता कार्यमा सञ्जार जगतले सकारात्मक भूमिका खेलिरहेको बताउनुभयो ।

पछिल्लो समय जिल्लामा भइरहेका विकासका अव्यवस्थित कार्यहरूले विनाश समेत निम्त्याएकोले यथार्थ कुराहरू खोजी गरेर सञ्चार जगतले सार्वजनिक गर्नुपर्नेमा सहभागीहरूले जोड दिएका थिए ।

नवदीप श्रेष्ठ