नागरिक समाजको सकारात्मक छवि निर्माण गर्नु आवश्यक

  ०७३ चैत २० गते

युएसएआइडीको आर्थिक सहयोग र एफएचआईको प्राविधिक सहयोग र अनौपचारिक क्षेत्र सेवा केन्द्र (इन्सेक) को आयोजनामा चैत २० गते हेटौँडामा नागरिक समाजको सकारात्मक छवि निर्माणको सवाल विषयमा अन्तरक्रिया सम्पन्न भएको छ ।

Photo20170402Makwanpur

कार्यक्रममा समाजशास्त्रका प्रध्यापक वीरेन्द्र साहले नागरिक समाज पारदर्शी र जबाफदेही भएन भने बलियो नहुने बताए । आचरण, जीवनशैली र सत्यप्रतिको निष्ठाले मात्र नागरिक समाज बलियो र समाजलाई मार्ग निर्देश गर्न सक्ने उनको तर्क थियो । नागरिक समाज बलियो भएमात्र लोकतन्त्र फष्टाउने विचार व्यक्त गर्दै प्राध्यापक साहले नागरिक समाज लोकतन्त्रको अभिन्न अङ्ग भएको बताए ।

Photo20170402Makwanpur1

पुनरावेदन वार एसोशियसन हेटौँडाका पुर्व अध्यक्ष मदन दाहालले नागरिक समाजको चरित्र स्थायी नभएकाले पनि समस्या भएको बताए । "दलहरू कमजोर भएको अवस्थामा नागरिक समाजको भूमिका महत्वपूर्ण देखिँदै आएको छ । दलहरू बलियो भएको नागरिक समाजको भूमिका कमजोर देखिने गरेको छ"-उनले भने ।

दलहरू बलियो भएको अवस्थामा नागरिक समाजलाई दलहरूले बलियो बनाउन नदिने तर्क गर्दै अधिवक्ता दाहालले भने-"दलहरूले नागरिक समाजलाई प्रतिस्पर्धी होइनन्, सहयोगी हुन् भनेर बुझ्नु पर्छ ।"

कार्यक्रममा जिल्ला वारका अध्यक्ष अज्मिर केसीले नागरिक समाजका व्यक्तिहरू पार्टीका कार्यकर्ता भएकाले नागरिक समाजप्रति सर्वसाधारणको विश्वास गुम्दै गएको बताए । शक्ति समूह मकवानपुरकी प्रमुख अस्मिता तामाङले नागरिक समाज दलीय स्वार्थ भन्दा माथि उठ्न सक्नु पर्ने बताइन् ।

प्रताप विष्ट