अपाङ्गमैत्री पूर्वाधार निर्माणमा जोड

  ०७६ माघ २७ गते

वीरेन्द्रनगर नपाका सामुदायिक विद्यालय तथा शौचालय अपाङ्गमैत्री निमार्ण गरिनु पर्ने विषयमा एक कार्यक्रमको सहभागिहरूले जोड दिएका छन् ।

इन्सेक कर्णाली प्रदेश कार्यालय, सुर्खेतले माघ २७ गते वीरेन्द्रनगरमा सम्पन्न शिक्षा, स्वास्थ्य, खाद्य र आवासका सवालको समस्या पहिचान तथा कार्ययोजना निमार्ण कार्यशालाका सहभागीहरूले सो विषयमा जोड दिएका हुन ।

सहभागीहरूले कर्णाली प्रदेश सरकारको राजधानीका रुपमा रहेको वीरेन्द्रनगर बजारमा प्रभावकारी अनुगमन नहुँदा आखाद्य बस्तु तथा मिसावट गरिएका खाद्य वस्तुहरू बिक्री वितरण भइहेको औंल्याएका थिए । उनीहरूले मापडण्ड विपरीतका सामान बिक्री वितरण भइरहेको, छाडा गाईबस्तु व्यवस्थित नगरिएको, अटो रिक्साले मनोमानी रुपमा भाडा लिने गरेको र निमार्ण सामाग्री बीच सडकमै राखिदा दुर्घटना बढेको समस्या पहिचान गरेका थिए ।

यस्तै वीरेन्द्रनगर नपा भित्र रहेका स्वास्थ्य संस्थाबाट निशुल्क औषधि र उपचार नगरिएको, स्वास्थ्यकर्मीको व्यवहार विरामी मैत्री नभएको, गर्भवती महिला तथा जेष्ठ नागरिकलाई सहज रुपमा उपचार सेवा नदिइएको र नीजि स्वास्थ्य संस्थाबाट प्रतिबन्धित औषधि बिक्री वितरण गरेको पाइएको जस्ता समस्या पहिचान गरिएको जिल्ला सहजकर्ता बिन्दुलाल रेग्मीले बताए ।

मानव अधिकार समूह वीरेन्द्रनगरका अध्यक्ष लक्ष्मी शर्माको अध्यक्षतामा सम्पन्न कार्यक्रममा समूहका सदस्य, युवा तथा बाल अधिकार चेतना समूहका प्रतिनिधि, अधिकारकर्मी, कृषक समूहका प्रतिनिधि र सरोकारवालाको सहभागिता रहेको थियो । इन्सेक प्रदेश कार्यालयका कार्यक्रम संयोजक डिलबहादुर चौधरीले कार्यक्रमको उद्देश्य माथि प्रकाश पारेका थिए ।

Resige Resige 1

दुर्गा थापा