शोक वक्तव्य

  २०७७ भदौ २८ गते

भारतका सामाजिक अभियन्ता स्वामी अग्निवेशको ८१ वर्षको उमेरमा यही भदौ २६ गते निधन भएको खबरले हामीलाई दुःखी तुल्याएको छ । शोकको यस घडीमा हामी उहाँप्रति भावपूृर्ण श्रद्धाञ्जलि व्यक्त गर्दछौँ । उहाँ नेपालको मानव अधिकार आन्दोलन, लोकतन्त्र र विगतमा यहाँ कायम रहेको बँधुवा श्रम विरोधी अभियानमा नेपालका मानव अधिकारकर्मीका सहयात्री हुनुहुन्थ्यो ।
मानवतावादी व्यक्तित्व स्वामीले दक्षिण एशियाली देशहरूमा बँधुवा मजदुर, महिलामाथि हुने हिंसा, दलितविरूद्ध हुने विभेदकाविरूद्ध आवाज उठाउनु भएको थियो । पञ्चायत विरोधी आन्दोलनमा नेपालका राजनीतिक दल तथा मानव अधिकारकर्मीसँग निकट रहेर काम गर्नुभएका स्वामी अग्निवेशले भुटानबाट लखेटिएका नेपाली भाषीका पक्षमा वकालत गर्नुभएको थियो ।
इन्सेकको स्थापनाकालदेखि नै इन्सेकसँग निकट रहनु भएका अग्निवेशले कमैया मुक्ति आन्दोलनका साथै अन्य विभिन्न अभियानका सन्दर्भमा पटक–पटक नेपाल भ्रमण गरी नेपालका सीमान्तकृत नागरिकका पक्षमा आवाज उठाउनु भएको थियो । उहाँ इन्सेकका संस्थापक सुशील प्याकुरेल तथा स्वर्गीय प्रकाश काफ्लेका असल मित्र हुनुहुन्थ्यो । सामाजिक अभियानमा पुर्‍याउनु भएको योगदानका कारण ‘राइट लाइवलीहुड अवार्ड’ बाट सम्मानित उहाँ सधैँ नै अतिवादीहरूको निशाना बन्नु भएको थियो ।
उहाँको निधनले भारतका मात्रै होइन समग्र दक्षिण एशियाको दलित आन्दोलन, बँधुवा मजदुर आन्दोलन, महिला तथा अल्पसङ्ख्यकको आन्दोलन र अभियानलाई अपूरणीय क्षति भएको छ । आफ्नो जीवनकालमा मानवताका लागि उहाँले देखाउनु भएको बाटो र सामाजिक योगदानका कारण उहाँ कैयौँ पुस्तासम्म जीवित रहनु हुने विश्वाससहित दुःखको यस घडीमा स्वामी अग्निवेशप्रति हार्दिक श्रद्धाञ्जली अर्पण गर्दछौँ ।

Dr. Indira Shrestha
डा.इन्दिरा श्रेष्ठ
अध्यक्ष