समाचारहरू

उर्लावारी नगरपालिका– ३ मङ्गलबारेमा दादुराको महामारी देखिएको छ । मङ्गलबारे क्षेत्रमा ६ जनामा दादुरा सङ्क्रमणको पुष्टी भएको प्रदेश क्षेत्रीय खोप निर्देशनालयले जनाएको छ ।

निर्देशनालयले –३ मा दादुरा महामारी भएको प्रदेश सामाजिक विकास मन्त्रालयको स्वास्थ्य महाशाखा, प्रदेश स्वास्थ्य निर्देशनालय र उर्लावारी नगरपालिकालाई जानकारी गराएको छ । ०७७ वैशाख १ गते एक जनामा दादुरा सङ्क्रमणको आशङ्का भएपछि परीक्षण गर्दा दादुरा पोजेटिभ देखिएको थियो ।

वैशाख १६ गते दोस्रो पटक परीक्षण गर्दा थप एक जनामा सङ्क्रमण देखिएको थियो । खोप निर्देशनालयका खोप अधिकृत उदेश श्रेष्ठको टोलीले नमूना परीक्षण गर्दा थप ६ जनामा दादुरा देखिएको पुष्टी भएपछि वडा – ३ मङ्कलबारेलाई प्रदेश सरकारले दादुरा महामारी क्षेत्र घोषणा गरेको छ ।

उर्लावारी नगरपालिकाले ज्वरो आउने, रूघाखोकी लाग्ने र शरीरमा बिमिरा निस्कने जस्ता लक्षण तथा चिन्हृ देखा परे तुरून्तै स्वास्थ्य संस्थामा सम्पर्क गर्न आग्रह गरेको छ ।

उर्लावारी नगरपालिकाका मेयर खड्ग फागोले दादुराको नियन्त्रणका लागि नगरपालिकाको स्वास्थ्य शाखालाई आवश्यक निर्देशन दिएको बताउनुभयो ।

दादुराका लक्षण देखिएका बिरामीहरूलाई मङ्गलबारे अस्पताल वा अन्य कुनै स्वास्थ्य संस्थामा सम्पर्क गर्न मङ्गलबारे अस्पतालका प्रमुख डा. योगेश मण्डलले आग्रह गर्नुभएको छ ।

नेत्रप्रसाद अधिकारी