४५ प्रतिशत बालविवाह हुने गरेको तथ्याङ्कले सरोकारवाला चिन्तित

  ०७३ मङ्सिर १० गते

प्युठान जिल्लामा ४५ प्रतिशत बालविवाह हुने गरेको तथ्याङ्कले गर्दा यहाँका सरोकारवालाले चिन्तित भएको जनाएका छन् ।

महिला तथा बालबालिका कार्यालयकी महिला विकास निरीक्षक माया श्रेष्ठले जिल्लामा बाल विवाहको अवस्था भयावह रहेको र सो अवस्थालाई अन्त्य गर्नको लागि सन् २०२२ सम्मका लागि महिला तथा बालबालिका कार्यालयले पाँच वर्षीय रणनीतिक योजना तयार गरेको बताइन् ।

बालविवाह न्यूनीकरणका लागि सबै सरोकारवाला निकायले आआफ्नो क्षेत्रबाट सहयोग गरी अभियानलाई सफल पर्नका लागि उनले अनुरोध गरेकी छन् ।

जिल्ला प्रहरी कार्यालयका प्रमुख डिएसपी रञ्जितसिह राठौरले जिल्लामा बालविवाह धेरै हुने भएता पनि प्रहरी कार्यालयमा निवेदन दर्ता नहुने र सामान्य छलफलबाट अभिभावकले नै 'कुरा मिलाउने' गरेकाले बालविवाह न्यूनीकरण नभएको बताए ।

महिला तथा बालबालिका कार्यालयले जिल्लामा मङ्सिर १ गतेदेखी ३० गतेसम्म एक महिने बालविवाह विरुद्धको अभियान सञ्चालन गरिरहेको छ ।


रविन्द्र पाण्डे