१८ दिनदेखि नगर र वडाका सेवा बन्द हुँदा स्थानीयलाई सास्ती !

  ०७६ फागुन ८ गते

पञ्चदेवल विनायक नगरपालिका र वडाबाट प्रवाह हुने सेवा १८ दिनदेखि बन्द हुँदा नगरबासीले सास्ती व्यहोरेका छन् ।

माघ २३ गतेदेखि बन्द नगरका सम्पूर्ण सेवा हालसम्म पनि सुचारू हुन नसक्दा स्थानीय सेवाबाट बिमुख भएका हुन् ।

नगर कार्यपालिकाले माघ २३ को बैठकमा वडा अध्यक्ष पदमबहादुर धामीको हत्यारा पत्ता नलाग्दासम्म नगरका सबै सेवा अनिश्चितकालिन बन्दको निर्णय गरेको थियो ।

नगरपालिका कार्यालय र नौ ओटै वडाहरू पूर्णरूपमा बन्द हुँदा सेवाग्राहीका अत्यावश्यक सिफारिस, प्रदेशको समपूरक र विशेष योजनाको अवधि समाप्त भइसक्दा समेत योजना सिफारिस गर्न नपाइएको बताइएको छ ।

बन्दका कारण तथ्याङ्क प्रविष्टी, नगरपालिकाका योजना तथा विकास निर्माणका कामको सम्झौतासँगै भुक्तानीका काम रोकिएको प्रमुख प्रशासकीय अधिकृत पदमबहादुर माझीले बताउनु भयो ।

वडाको सेवा लिन एक दिनमा १० जनाभन्दा बढीले फोन नै गर्ने गरेको उक्त नगरपालिका–३ का वडा अध्यक्ष सुरेन्द्रबहादुर शाहीले जानकारी दिनुभयो ।

‘अब केही दिनमा हुन्छ भनेर टार्ने काम भएको छ । नगरको निर्णय मान्नै प¥यो ।’–वडा अध्यक्ष शाहीले भन्नु भयो ।

मृतकका आफन्तको दबाबमा नगरका काम बन्द गरिएकोले उनीहरूसँग समन्वय गरेर नगरको काम सुचारु गर्न पहल गरिने काठमाडौँमा रहनुभएका नगरप्रमुख देवराज देवकोटाले जानकारी दिनु भयो ।

‘केही दिनमा अछाम आएर नगर बन्द खुलाउने पहल गर्छु ।’–देवकोटाले भन्नुभयो । कार्यपालिकाबाटै नगरका सबै काम बन्द गर्ने निर्णय भएकाले कार्यपालिकाकै बैठकले निर्णय गर्नुपर्ने भएको प्रशासकीय अधिकृत माझीको भनाइ छ ।

सीआइबी, तालिमप्राप्त कुकुर र अछाम प्रहरीको टोलीले घटनाका बारेमा अनुसन्धान जारी राखेको जिल्ला प्रहरी कार्यालयका डिएसपी दीपक भारतीले बताउनु भयो ।

सोही नगरपालिका–२ स्थित गैरीगाउँमा छिमेकीको भैँसीगोठमा वडा अध्यक्ष धामीको शव माघ २१ गते बिहान फेला परेको थियो ।


शिवराज ढुङ्गाना