हुम्लामा कारागार नहुँदा कैदीबन्दीलाई समस्या

  ०७५ साउन १३ गते

हुम्लामा कारागार नभएपछि कैदीबन्दीलाई समस्या भएको छ । जिल्लामा रहेको एक मात्र कारागारको अवस्था जीर्ण भएकाले कैदीबन्दीलाई समस्या देखिएको हो ।

साउन १३ गते जेलर निमा गुरूङसँग इन्सेक प्रतिनिधि नन्द सिंहले कैदीबन्दीलाई भेट्ने अनुमति लिएपछि कैदीबन्दीसँग भेट भएको थियो । कारागारको छुट्टै भवन नभएपछि जिल्ला प्रहरी कार्यालय हुम्लाकै हिरासतमा थुनुवाहरूसँगै बस्न बाध्य भएको अदालतको आदेशमा पुर्पक्षमा रहेका धनलाल रोकायाले गुनासो गरे ।

उनले भने–‘खेल मनोरञ्जनका लागि कुनै पनि सामग्री छैन ।’ स्वास्थ्य गडभडी भएमा समयमै उपचार नहुने जस्ता समस्या झेल्नु परेको समस्या बताए । रोकायाले बेलामै कुनै पनि सेवा सुविधा पाउन नसकेको भन्दै दुःख व्यक्त गरे ।

२५ जना कैदीबन्दीको क्षमता रहेको हुम्ला कारागार पुनःनिर्माण नहुँदा कैदीबन्दीहरू समस्यामा परेका हुन् । प्रहरीको हिरासतमा रहेका चार जनामध्ये तीन जना थुनुवा र एक जना कैदी छन् । यतिखेर सबै जनालाई सँगै सुताउने र सँगै खाना खुवाउने गरेको जेलर निमा गुरूङले बताए ।

जेलर गुरूङका अनुसार हुम्लामा कारागरको नयाँ भवन बन्दै छ । समयमै भनेको सामान नपाउँदा उपचार र खानपीनलगायत विभिन्न सेवासुविधा पनि दिन नसकिएको उनले बताए ।


नन्द सिंह