हराएकी महिलाको शव फेला, घटना शङ्कास्पद रहेको प्रहरीको भनाई

  ०७६ साउन ३२ गते

साउन २४ गते रात घरबाट हराएकी ताराखोला गाउँपालिका–५ माटोबिसाउनेकी २५ वर्षीया दोजिना पुन साउन ३१ गते साँझ सात दिनपछि सोही ठाउँको मदन खोला किनारमा मृत अवस्थामा फेला परेकी छिन् ।

साउन २५ गते बिहान दोजिनाका पति मनबहादुर पुनले पत्नी हराएको भन्दै छिमेकीलाई भनेपछि सोही दिन इलाका प्रहरी कार्यालय गल्कोटमा निवेदन दिएर खोजी कार्य सुरू गरिएको थियो ।

परिवारले हराएको भन्दै निवेदन दिएपनि अनुसन्धानको क्रममा पतिपत्नी बिचमा सधैँ झै–झगडा भइरहने, समय समयमा छिमेकीहरूले मिलाउने समेत गरेको र मृतकको सामाजिक सञ्जाल फेसबुकमा परिवारका सदस्यहरूबाट आफू पीडित भएका जस्ता स्टाटसहरू अपलोड हुँदै आएकाले घटना शङ्कास्पद रहेको जिल्ला प्रहरी कार्यालय बागलुङका एसपी नवराज भट्टले बताए ।

मृतक दोजिनाको शव धौलागिरी अञ्चल अस्पताल ल्याइएको र आइतबार पोस्टमार्टम गरी रिपोर्ट आएपछि अनुसन्धानमा थप सहज हुने प्रहरीको भनाई छ ।


सिर्जना पन्त