समाचारहरू

कटारी नगरपालिका–११ लखनथुम्काकी ५० वर्षीया महिला डोरकुमारी राउतको हत्या गरेको कसुरमा जिल्ला अदालतले सोही ठाँउका २५ वर्षीय रोशन राउतलाई मङ्सिर १७ गते आजीवन काराबासको फैसला सुनाएको छ ।

न्यायाधीश दीपक खनालको इजलासले कसुर गरेको ठहर गर्दै आजीवन काराबाससहित पीडितले पाउने गरी कसुरदारबाट १ लाख रुपियाँ क्षतिपूर्ति भराउन आदेश भएको अदालतका सूचना अधिकारी राजकुमार आचार्यले इन्सेक प्रतिनिधिसँगको भेटमा बताउनु भयो ।

पीडित महिलालाई आरोपितले ०७७ भदौ २७ गते घरमा एक्लै भएको मौका छोपी खुकुरी प्रहार गरी हत्या गरेको आरोपमा पीडितका आफन्त दुर्गाबहादुर राउतले सोही दिन इलाका प्रहरी कार्यालय कटारीमा उजुरी दिनु भएको थियो ।

आरोपितलाई प्रहरीले घटना भएकै दिन घरबाट गिरफ्तार गरी जिल्ला अदालतमा कर्तव्य ज्यान शीर्षकमा मुद्दा दर्ता गरी कारबाही अघि बढाएको थियो ।

अदालतले असोज २१ गते आरोपितलाई पुर्पक्षका लागि थुनामा राख्न आदेश दिएको थियो ।

शवको पोष्टमार्टम भदौ २७ गते कटारी अस्पतालमा गरिएको थियो ।

भरत खड्का