स्वास्थ्य संस्थाहरूमा औषधिको चरम अभाव

  ०७३ भदौ २५ गते

बैतडीका स्वास्थ्य संस्थाहरूमा औषधिको चरम अभाव भएको छ । गतसालको नाकाबन्दीदेखि नै औषधि आपूर्तिमा समस्या भएपछि स्वास्थ्य संस्थाहरूमा औषधिको अभाव रहँदै आएको छ ।

सरकारले स्वास्थ्य चौकीबाट ४० प्रकारका औषधि, प्राथमिक स्वास्थ्य केन्द्रबाट ५० प्रकारका औषधि र जिल्ला अस्पतालबाट ७० प्रकारका औषधि निःशुल्क वितरण गर्ने नीति लिएको भएपनि स्वास्थ्य संस्थाहरूमा औषधिको अभाव कायमै रहेको छ ।

पछिल्लो समयमा ज्वरोका बिरामीहरूको सङ्ख्या बढ्दै गएको र स्वास्थ्य संस्थामा औषधि नहुँदा उपचारमै समस्या भएको हाट स्वास्थ्य चौकीका इञ्चार्ज विनोद कुँवरले बताए । स्वास्थ्यचौकीमा टाइफाइडका बिरामीहरू बढेपनि औषधि नहुँदा उपचारमा निकै समस्या भएको छ । जिल्ला स्वास्थ्य कार्यालयबाट माग अनुसारको औषधि आपूर्ति नहुँदा नागरिकलाई सास्ती भएको स्वास्थ्य चौकीका इञ्चार्ज कुँवरले बताए ।

सिद्धेश्वर स्वस्थ्य चौकी खोड्पेमा गएको एक महिना यता आइरन चक्कीसमेत सकिएकोले गर्भवती महिलालाई वितरण गर्न नसकिएको स्वास्थ्य चौकीका इञ्चार्ज मदन महराले जानकारी गराए ।

स्वास्थ्य संस्थामा औषधि नहुँदा निःशुल्क पाइने औषधिसमेत सेवाग्राहीलाई किन्न लगाउनु पर्ने अवस्था आएको प्राथमिक स्वास्थ्य केन्द्र पाटनका डा. शशी कडेलले बताए ।

शर्माली स्वास्थ्य चौकीका इञ्चार्ज प्रकाश चन्दका अनुसार स्वास्थ्य संस्थामा औषधिको अभाव हुँदा समस्या थपिएको छ । साथै ग्रामीण क्षेत्रमा मेडिकलसमेत नहुँदा नागरिकले सामान्य औषधिको अभाव झेलिरहेका छन् ।

जिल्लाभरी औषधिको अभाव भएको बारेमा जिल्ला स्वास्थ्य कार्यालय, बैतडीका आरआरटी फोकल पर्सन सन्तोष पाण्डेयले माग अनुसार औषधि पूर्ति नभएको बताए । गत सालदेखि नै आपूर्ति व्यवस्थामा समस्या आएकाले माग अनुसार औषधि पूर्ति नभएको उनले बताए ।

जिल्ला स्वास्थ्य कार्यालयले टेण्डर आह्वान गरेर औषधि किन्ने प्रक्रिया अगाडि बढाएपनि अझै २ महिना लाग्ने जिल्ला स्वास्थ्य कार्यालय, बैतडीका प्रमुख डक्टर गुणराज अवस्थीले जानकारी दिए ।


नरी बडु