स्वास्थ्य संस्थामा पाँच महिनादेखि स्वास्थ्यकर्मी नहुँदा सेवाग्राही मर्कामा

  ०७३ चैत १८ गते

सिमकोट गाउँपालिकास्थित इलाका स्वास्थ्य चौकीमा कार्यरत स्वास्थ्यकर्मी पाँच महिनादेखि नहुँदा स्थानीयबासी मर्कामा परेका छन् ।

उक्त स्वास्थ्य चौकीका इञ्चार्ज ०७३ मङ्सिर महिनादेखि नहुँदा कार्यालय सहयोगी अङ्गबहादुर शाहीको भरमा स्वास्थ्य चौकी खुल्ने गरेको स्थानीयबासी हरि शाहीले गुनासो गरे ।

कार्यालय सहयोगी शाहीले औषधि नचिन्ने भएकोले कार्यालय खोल्ने र बन्द गर्ने बाहेक अन्य स्वास्थ्य सेवा सेवाग्राहीले नपाएको स्थानीयबासी मोहन शाहीले बताए । उनले भने-'इलाका स्वास्थ्य चौकीमा स्वास्थ्यकर्मी नहुँदा सिमकोट गाउँपालिका-७ का करिव १ हजार २ सय जना नागरिक मर्कामा परेका छन् ।'

त्यसैगरी सो इलाका स्वास्थ्य चौकीमा एचए, अनमी, अहेब र कार्यालय सहयोगी गरी जम्मा पाँच जनाको दरबन्दी रहेकोमा हाल एक जनामात्र कार्यरत रहेको सिमकोट गाउँपालिका-२ की तिलसरा बिकले बताइन् ।

इलाका स्वास्थ्य चौकीमा औषधि भएपनि औषधि चिनेर दिने स्वास्थ्यकर्मी नहँदा प्रसुति व्यथा लागेकी महिला दुर्गा शाही उपचारबाट वन्चित भएको शाहीका आफन्तले बताएका छन् ।

जिल्ला जनस्वास्थ्य कार्यालयका प्रमुख डा. स्मृति महतले गत मङ्सिर ५ गतेसम्म उक्त स्वास्थ्य चौकीमा इञ्चार्ज जनक धिताल रहेको र त्यस पश्चात धितालको सरूवा भएकोले उक्त स्वास्थ्य चौकीमा प्रमुख नभएको बताउँदै तत्काल स्वास्थ्यकर्मी पठाउने प्रतिवद्धता व्यक्त गरेकी छन् ।


नन्द सिंह