स्वास्थ्य चौकीमा स्वास्थ्यकर्मी र औषधिको अभाव रहेको स्थानीयबासीको गुनासो

  ०७३ असोज १५ गते

लिमी स्वास्थ्य चौकीमा दरबन्दी अनुसार स्वास्थ्यकर्मी र औषधि नहुँदा सेवाग्राही प्रभावित भएको स्थानीयबासीले गुनासो गरेका छन् ।

उक्त स्वास्थ्य चौकी १५ वर्षघि स्थापना भएपनि स्वास्थ्यकर्मी र औषधिको अभाव रहेको लिमी गाविसका पुर्व अध्यक्ष कोजु अङ्कर तामाङले बताए । उक्त स्वास्थ्य चौकीमा ६ जना स्वास्थ्यकर्मीको दरबन्दी रहेकोमा हाल तीन जनामात्र कार्यरत रहेको जिल्ला जनस्वास्थ्य कार्यालयका प्रमुख डा. स्मृति महतले बताइन् ।

स्वास्थ्य चौकीमा सिटामोल, जीवनजल लगायतका औषधि नहुँदा लिमीका स्थानीयबासी स्वास्थ्य सेवाबाट प्रभावित भएका छन् । जनस्वास्थ्य प्रमुख महतले दरबन्दी अनुसार स्वास्थ्यकर्मीका लागि विभागमा माग गरिएको बताउँदै थप औषधि तत्काल पठाउने प्रतिबद्धता व्यक्त गरेकी छन् ।

नेपाल सरकारले ४२ किसिमका औषधि स्वास्थ्य चौकीमा उपलब्ध गराउने प्रावधान रहेको भएपनि पुरा हुन नसकेको स्थानीयबासी बताउँछन् ।

औषधि गाउँमा नपुग्दै बीचमा गायव हुने गरेको स्थानीयबासीले आरोप लगाएका छन् । स्वास्थ्य चौकीमा औषधि र स्वास्थ्यकर्मी नभएपछि हालै उक्त गाविसका पाँच जना बिरामीलाई हेलिकप्टरबाट उपचारका लागि सदरमुकाम ल्याइएको छ ।

सदरमुकामदेखि टाढा रहेको र सम्बन्धित निकायको अनुगमन नहुँदा गाउँ विकास समितिको कार्यालयबाट प्रदान गरिने अन्य सेवासमेत स्थानीयबासीले नपाएको गाविसका पुर्व अध्यक्ष तामाङ्ले आरोप लगाए ।

उनका अनुसार लिमीमा स्वास्थ्य, शिक्षा, पशु र कृषि कार्यालयबाट प्रदान गरिने सेवा स्थानीयबासीले पाएका छैनन ।


नन्द सिंह