स्वास्थ्यकर्मी नहुँदा सेवा प्रवाहमा समस्या

  ०७७ पुस १५ गते

ताँजाकोट गाउँपालिका–२ को मैला स्वास्थ्य चौकीमा ०७७ मङ्सिर पहिलो हप्ताबाट स्वास्थ्यकर्मी नहुँदा सेवा प्रबाहमा समस्या भएको छ ।

अत्याधिक पेट दुखेपछि उपचार गर्न गएकी ताँजाकोट गाउँपालिका–२ की जयकला जैसी तीन घण्टा स्वास्थ्य चौकीमा कुरेर पनि उपचार नपाएको गुनासो गर्नु भयो । आफू जस्तै अन्य बिरामीहरुले पनि समयमा उपचार नपाएको उहाँको दुःखेसो छ ।

स्वास्थ्य चौकी इन्चार्ज धनराज ढकालका अनुसार जिल्ला अस्पतालपछि बढी सेवा प्रबाह हुने मैला स्वास्थ्य चौकीमा पाँच जना मात्र स्वास्थ्यकर्मीको दरबन्दी भएको र हाल दुईजना बिदामा बसेकोले बिरामीलाई सेवा प्रदान गर्न नसकिएको बताउनु भयो ।

ढकालका अनुसार स्वास्थ्य चौकीमा इन्चार्ज सहित दुई जना अनमी र दुई जना अहेवको दरवन्दी भएपनि हाल दुई जना मात्र कार्यरत छन् । चिसो बढेको कारण सिजनल फ्लुका बिरामी देखि दिर्घ रोगीहरू दैनिक ८० जनासम्म आउने बिरामीलाई पर्याप्त समय दिन नसकिएको उहाँले बताउनु भयो ।

खोप लगाउने दिनमा झन समस्या हुने गरेको बताउँदै इन्चार्ज ढकालले भन्नुभयो ‘गर्भ जाँच देखि सुत्केरी समेत गराउनु पर्दा भ्याइ नभ्याइ हुन्छ ।’

मैला स्वास्थ्य चौकीमा थप स्वास्थ्यकर्मीको लागि सामाजिक विकास मन्त्रालय र गाउँपालिकामा माग गर्दा व्यवस्था नभएको स्वास्थ्यकर्मीले गुनासो गरेका छन् । बिदामा बसेका कर्मचारीको विषयमा भर्खरै जानकारी पाएको र काममा फर्काउन पहल गरिने गाउँपालिकाका स्वास्थ्य संयोजक राजेन्द्र स्याङ्कुको भनाई छ ।

दरबन्दी अनुसार स्वास्थ्यकर्मी थप्न नमिल्ने भएकोले गाउँपालिका र स्वास्थ्य शाखाको समन्यमा स्वास्थ्य चौकीमा औषधि पर्याप्त मात्रामा उपलव्ध गराइएको ताँजाकोट गाउँपालिका अध्यक्ष बागदल मल्लले बताउनु भयो ।


नन्द सिंह