स्वास्थ्यकर्मी नहुँदा कैदीबन्दीलाई उपचारमा समस्या

  ०७७ पुस १६ गते

स्वास्थ्यकर्मी नहुँदा तनहुँ कारागारका कैदीबन्दीको उपचारमा समस्या भएको छ । कारागारमा कार्यरत स्वास्थ्यकर्मी गत वर्षको असोज महिनामा समायोजनको क्रममा अन्यत्रै सरूवा भएर गएपछि कैदीबन्दीहरू नियमित स्वास्थ्य उपचारको सेवाबाट वञ्चित भएका हुन् ।

तनहुँ कारागारमा एक जना स्वास्थ्य सहायक (एचए) दरबन्दीको स्वास्थ्यकर्मी कार्यरत रहेकोमा उनी दशै अगाडी नै समायोजनको क्रममा अन्यत्रै गएको त्यस यता अर्को स्वास्थ्यकर्मी नआउँदा कैदीबन्दी नियमित स्वास्थ्य उपचार सेवाबाट बञ्चित भएको कारगारका सूचना अधिकारी नारायण अधिकारीले बताउनुभयो ।

‘अहिले कारागारमा अहेवको दरबन्दी कायम भएको छ तर स्वास्थ्यकर्मी आएका छैनन् ।’–उहाँ भन्नुहुन्छ–‘स्वास्थ्यकर्मी नहुँदा सामान्य उपचारको लागि पनि कैदीबन्दीलाई दमौली अस्पतालमा लैजानुपर्ने बाध्यता रहेको छ ।’

अहिले चिसो बढेपछि कैदीबन्दीमा पनि विभिन्न खाले स्वास्थ्य समस्याहरू देखिन थालेको तर कारागारमा स्वास्थ्यकर्मी नहुँदा उनीहरूलाई उपचार र स्वास्थ्य परीक्षणकोलागि दमौली अस्पतालमा लैजानुपर्ने बाध्यता रहेको अधिकारीले बताउनुभयो ।

एक सय पाँच जना क्षमताको कारागारमा अहिले एक सय ८७ जना कैदी र ८२ जना थुनुवा गरी जम्मा दुई सय ६९ जना छन् ।

क्षमता भन्दा धेरै कैदीबन्दी एकै ठाउँमा राख्नुपर्दा र एक आपसमा टाँसिएर सुत्नुपर्दा कैदीबन्दीमा बढी मात्रामा छाला सम्बन्धी रोगहरू र त्यसबाहेक रूघा खोकी र भाईरल ज्वँरो जस्ता स्वास्थ्य समस्याहरू देखिन थालेको अधिकारीले जानकारी दिनुभयो ।

स्वास्थ्यकर्मी नहुँदा विभिन्न रोगका कारण दैनिक चार /पाँच जना कैदीबन्दीलाई स्वास्थ्य परीक्षणकोलागि अस्पतालमै लानुपर्ने बाध्यता रहेको बन्दीहरूका नाईके विष्णुहरि घिमिरेले बताउनुभयो ।

उहाँले अहिले कोभिड- १९ को अवस्थामा सङ्क्रमणको डर हुँदा पटकपटक सामान्य रोगको उपचारमा अस्पताल जानुपर्नेले थप स्वास्थ्य अवस्थामा जोखिम बढाएको बताउनुभयो ।

कारागारको आफ्नै सवारी साधन नहुँदा जिल्ला प्रहरी कार्यालयबाट सवारी साधन मगाएर मात्र कैदीबन्दीको स्वास्थ्य परीक्षणकोलागि लैजानुपर्ने अधिकारीले बताउनुभयो ।

स्वास्थ्य कार्यालय तनहुँका प्रमुख शंकरबाबु अधिकारीले कारागारमा आउने स्वास्थ्यकर्मीको टुंगो पनि लागिसकेको तर के कारणले आउनमा ढिलाई भएको हो भन्ने बारेमा जानकारी नभएको हुँदा अब उनको खोजि गरी जतिसक्दो छिटो कार्यक्षेत्रमा आउन ताकेता गर्ने बताउनुभयो ।


प्रकाशचन्द्र भट्टराई