स्वास्थ्यकर्मीलाई वडा सचिवमा सरूवा गरेपछि स्वास्थ्य चौकीको सेवा प्रभावित

  ०७६ मङ्सिर २८ गते

चौतारा सागाचोकगढी–७ स्थित सानुसिरूवारी स्वास्थ्य चौकीका प्रमुख तथा अहेव केशव नापितलाई सोहि वडाको सचिवमा सरूवा गरेपछि सो स्वास्थ्य चौकीबाट हुने सेवा ग्राहीलाई गरिने स्वास्थ्यसेवा प्रवाहमा अवरोध पुगेकोे छ ।

अहेब प्रमुख सहित पाँच जना स्वास्थ्य कर्मीको दरबन्दी रहेको सो स्वास्थ्य चौकीमा एकजना अनमी र एकजना खोप कार्यकर्ता मात्र बाँकी रहेका छन् ।

मङ्सिर १५ गतेदेखि सो स्वास्थ्य चौकीका अहेब केशव नापितलाई वडा सचिवको जिम्मेवारी दिएपछि स्वास्थ्य सेवा प्रभावित भएको स्वास्थ्य चौकी व्यवस्थापन समितिका अध्यक्ष केदार दुलालले बताउनुभयो ।

उनका अनुसार बिरामीहरूलाई स्वास्थ्य सेवा प्रदान गरिरहेका स्वास्थ्यकर्मीलाई प्रशासनिक काममा लगाएर नगरपालिकाले स्वास्थ्य सेवालाई बेवास्ता गरेको बताए ।

दम र खोकीको रोगको उपचार गर्न आएकी ७३ वर्षीया रत्नमाया तामाङ अहेब नभएपछि उपचार नगराएर भोलि आउनुपर्ला भन्दै मङ्सिर २५ गते आफू घर फर्कनु परेको बताउनुभयो ।

आफूले स्वास्थ्य चौकीमा रहेर बिरामीहरूको उपचारमा संलग्न रहँदारहँदै पनि अप्रत्याशित वडा सचिवको काम गर्न पठाएकोमा आफू आश्चर्यचकित भएको स्वास्थ्यकर्मी केशव नापितले बताउनुभयो ।

स्वास्थ्य क्षेत्रमा कर्मचारी समायोजनको काम पुरा नभएको, सो वडामा स्थायी कर्मचारीको अभाव भएको र पञ्जिकाधिकारीको काम स्थायी कर्मचारीले मात्र गर्नुपर्ने भएकाले वडा सचिवको काम पनि सोही वडाको स्वास्थ्य चौकीका इञ्चार्जलाई जिम्मेवारी दिनुपरेको चौतारा सागाचोकगढी नगर पालिकाका स्वास्थ्य प्रमुख शिव पुरीले बताउनुभयो ।


नातिबावु धिताल