स्वास्थ्यकर्मीलाई दुर्व्यवहार घटनाका आरोपित गिरफ्तार

  ०७७ जेठ २ गते

जिल्ला अस्पताल पर्वतमा कार्यरत स्वास्थ्यकर्मीलाई दुर्व्यवहार गरेको आरोपमा ३५ वर्षीय अरूण पौडेललाई जिल्ला प्रहरी कार्यालय पर्वतले गिरफ्तार गरेको छ ।

फलेबास नपा–१ कार्कीनेटाका पौडेल जिल्ला अस्पताल पर्वतमा बच्चाको उपचारका लागि वैशाख ३१ गते आएका थिए ।उहाँले स्वास्थ्यकर्मीले बालकको रेखदेखमा नियमित वार्डमा नआएको भन्दै गालीगलौज र हातपातको प्रयास गरेका थिए ।

कोरोना महामारीको बेला अहोरात्र खटिएका स्वास्थ्यकर्मी माथि वैशाख ३१ गते बिहान अरूण पौडेलले हातपात गर्न खोजेको र अपशब्द प्रयोग गरी गालीगलौज गरेको भन्दै कारवाहीको माग गर्दै जिल्ला अस्पताल पर्वतका प्रमुख डा. शिशिर देवकोटाले वैशाख ३१ गते जिल्ला प्रहरी कार्यालय पर्वतमा मौखिक उजुरी दिनुभएको थियो ।

प्रहरीले सोही दिन आरोपितलाई गिरफ्तार गरी बच्चाको उपचार पश्चात जिल्ला प्रहरी कार्यालय पर्वतमा हाजिर हुने गरी तारेखमा छाडिएको इन्स्पेक्टर विकास थापाले जानकारी दिनुभयो ।


सन्तोष थापा