समाचारहरू

संविधानको धारा ३५ को स्वास्थ्यसम्बन्धी हक अन्तर्गत प्रत्येक नागरिकलाई स्वच्छ खानेपानी तथा सरसफाई पहुँचको हक हुनेछ भनी स्पष्ट व्यवस्था गरिएको भएपनि बैतडीको पञ्चेश्वर गाउँपालिका-२ माहाकाली र वडा नम्बर-४ विनायकका स्थानीयहरू शुद्ध पिउने पानीबाट वञ्चित भएका छन् ।

यी वडाका गाउँहरूमा खानेपानीको चरम अभाव हुँदा स्थानीयले माहाकाली नदी र स्थानीय खोलाको दुषित पानी पिउनु पर्ने बाध्यता भएको हो ।

'स्वच्छ खानेपानीको अभावका कारण माहाकालीको धमिलो पानी पिउन बाध्य छौँ ।'-पञ्चेश्वर गाउँपालिका-४ विनायकका प्रदीप चन्दले भने-'त्यही पानी ल्याउनलाई पनि घण्टौँ हिड्नु पर्ने बाध्यता छ ।'

गाउँमा खानेपानीको अभाव भएको वर्षौँ बितिसक्दासमेत स्थानीय, प्रदेश तथा सङ्घीय सरकारले बेवास्ता गरेको स्थानीयको आरोप छ ।

गाउँ नजिकका पिउने पानीका मुहान सुकेपछि विनायक र माहाकालीका स्थानीयले माहाकाली नदीको धमिलो पानी पिउने गरेको स्थानीय मोहन चन्दले बताए ।

उनले भने-'३५ लिटरको जारमा माहाकालीबाट पानी ल्याउन स्थानीय महिलाहरू झिसमिसेमै काली किनारमा जान्छन ।'

खानेपानीको अभावमा अनिदो बसेर पानीको जोहो गर्नु पर्ने अवस्था आएको स्थानीय सुना दमाइले दुखेसो पोखिन् ।

उनले भनिन्-'गाउँको धारामा दैनिक २० लिटर मात्रै पानी पाइने र त्यो पनि नियमित नआउने समस्याले यहाँका महिलाहरू समस्यामा छन् । हाम्रो पीडा कसले सुनिदिने ।'

महाकालीबमा पानी भर्न जाँदा आफूहरूलाई जोखिमसमेत रहेकोले समस्या समाधानका लागि पहल गरी दिन स्थानीय नन्दा सार्कीले अनुरोध गरिन् ।

पानीकै अभावका कारण यस क्षेत्रमा शौचालय प्रयोगको दरमा पनि कमी आएको पञ्चेश्वर-२ माहाकालिका स्थानीय दीपक चन्दले बताए ।

पञ्चेश्वर गाउँपालिका-२ र ४ मा मात्रै नभई यहाँका अधिकांश ठाउँहरूमा खानेपानीको अभाव रहेको गाउँपालिका अध्यक्ष गोरखबहादुर चन्दले बताए ।

उनले भने-'हाम्रो गाउँपालिकाको प्रमुख समस्या भनेकै शुद्ध खानेपानी पाउनु हो । यसका लागि प्रदेश र सङ्घीय सरकारसँग समन्वय गरिरहेका छौँ । नजिक मुहान नभएका कारण यहाँका स्थानीयको खानेपानी समस्या समाधान गर्न नसकिएको हो । अब प्रदेश र सङ्घीय सरकारलगायत विभिन्न दातृ निकायसँग माहाकालीकै पानी लिफ्टिङ गरेर भएपनि समस्या समाधान गर्न लागि रहेका छौँ ।'

नरी बडु