स्थानीय र सुरक्षाकर्मीबीच झडप, सात जना सुरक्षाकर्मी र एक जना स्थानीय घाइते

  ०७६ वैशाख १७ गते

चालकको लापरवाहीका कारण लम्कीचुहा नगरपालीका निवासी लम्की बहुमूखी क्यापसमा अध्ययनरत १९ वर्षीया छात्रा सुनिता रावलको वैशाख १७ गते मृत्यु हुन गएको भन्दै स्थानीयहरूले प्रदर्शन गरेपछि प्रहरी र स्थानीयबीच झडप भएको छ ।

झडपका क्रममा सात जना सुरक्षाकर्मी र एक जना स्थानीय घाइते भएको जनाइएको छ । घाइते हुने सुरक्षाकर्मीहरूमा गणेश रावल, सुरत रावल, रामबहादुर बुढा, प्रेम सिंह धामी, बमबहादुर सुनार, फलाराम चौधरी, सन्दिप चौधरी र स्थानीय प्रेमराज मुडभरी रहेको जिल्ला प्रहरी कार्यालय, कैलालीमा डिएसपी दक्षकुमार बस्नेतले जानकारी दिए ।

घाइते सबैजनाको लालरत्न अस्पताल, लम्कीमा उपचार भइरहेको र स्थिति नियन्त्रणमा लिन थप सुरक्षाकर्मी परिचालन गरिएको डिएसपी बस्नेतले बताए ।

प्रहरीले ट्रक चालक सुनील भण्डारीलाई नियन्त्रणमा लिएर कारवाही गर्ने बताए पनि स्थानीयहरूले ट्रक तोडफोड गर्नुको साथै सडकसमेत बन्द गराई मृतकको परिवारलाई उचित क्षतिपुर्तिको माग राखी प्रदर्शन जारिराखेका छन् ।

पुर्वबाट पश्चिमतर्फ गइरहेको ना ७ ख ९२३३ नम्बरको ट्रकले लम्कीचुहा नगरपालिका निवासी लम्की बहुमूखी क्यापसमा अध्ययनरत छात्रा १९ वर्षीया सुनिता रावललाई वैशाख १७ गते बिहान लम्कीबाजरमा ठक्कर दिँदा मृत्यु भएको थियो ।


मैनामोती चौधरी