स्थानीय तहमा कर्मचारीको अभाव, स्वास्थ्यचौकी इन्चार्जलाई वडा सचिवको कार्यभार !

  ०७६ असोज २२ गते

भूमे, सिस्ने र पुथा उत्तरगङ्गा गाउँपालिका गरी तीन स्थानीय तह भएको रूकुम पूर्वका ३१ ओटा वडामा नौ जना मात्र वडा सचिव कार्यरत रहेका छन् ।

कर्मचारीको अभावका कारण यहाँका स्थानीयले दैनिक कामकाजमा बाधा खेपिरहेका छन् । भूमे गाउँपालिकामा नौ ओटा वडा रहेका छन् । जसमा चार जना सचिव मात्र कार्यरत छन् ।

त्यसैगरी सिस्ने गाउँपालिकामा आठ ओटा वडा रहेकामा पाँच जना सचिव कार्यरत रहेका छन् । त्यसैगरी पुथा उत्तरगङ्गा गाउँपालिकाकमा रहेका १४ ओटा वडामा एक जना पनि सचिव छैनन् ।

कर्मचारी समायोजन अघि एक जना वडा सचिव थिए । समायोजनपछि एक सचिवले पनि अन्यत्र ठाउँमा रोजेर गए ।

जिल्लाको सबैभन्दा पुथा उत्तरगङ्गा गाउँपालिकामा कर्मचारीको चरम समस्या रहेको छ । कूल ६१ जना दरबन्दी रहेको गाउँपालिकामा अहिले प्रमुख प्रशासकीय अधिकृत र महिला तथा बालबालिका शाखाका एकजना कर्मचारी मात्र तोकिएको दरबन्दी अनुसार स्थायी कर्मचारी रहेका छन् ।

लेखापाल स्थायी भएपनि समायोजनमा सङ्घ रोजेकाले अहिले काजमै बसेर काम गरिरहेको गाउँपालिकाका अध्यक्ष ओमप्रकाश घर्ती मगरले जानकारी दिए ।

त्यसबाहेक गाउँपालिकामा हुनुपर्ने विभिन्न फाँट अनुसारका कर्मचारीहरू छैनन् । प्राविधिक फाँटमा एकजना इन्जिनियर सहित सात जना कर्मचारी करारमा लिएर काम गरिरहेको उनको भनाई छ ।

१४ ओटा वडा रहेको यस गाउँपालिकाको कुनैपनि वडामा सचिव नहुँदा स्वास्थ्यचौकीका इञ्चार्जहरूलाई सचिवको कार्यभार तोकिएको अध्यक्ष घर्तीले बताए ।

पाँच ओटा वडामा सहायक कर्मचारी र सबै वडामा कार्यालय सहयोगी भएपनि उनीहरूले पञ्जीकरणका कागजातमा हस्ताक्षर गर्न नमिल्ने भएकाले स्वास्थ्यका कर्मचारीलाई तोकिएको गाउँपालिकाले जनाएको छ ।

यस गाउँपालिकामा रहेका ६ ओटा स्वास्थ्य चौकी इञ्चार्जहरूलाई विभिन्न वडाको जिम्मेवारीमा राखी १४ ओटा वडामा सचिवको जिम्मेवारी तोकिएको हो ।

त्यसमा सबैभन्दा बढी मैकोट स्वास्थ्य चौकी इञ्चार्ज समिर गिरीले १ देखि ४ नम्बर वडाको सचिवको जिम्मेवारी सम्हालेका छन् ।

स्वास्थ्य चौकी इञ्चार्जको जिम्मेवारी हुँदा हुँदै चार ओटा वडामा सचिवको कार्यभार पनि सम्हाल्दा समस्या भएको मैकोट स्वास्थ्य चौकी इञ्चार्ज गिरीले सुनाए ।

‘कर्मचारीको अभावकै कारणले बाध्यताले चार ओटा वडामा सचिवको कार्यभार, स्वास्थ्य चौकीको इञ्चार्ज र अहिले फेरि गाउँपालिकाको स्वास्थ्य संयोजक समेत पनि बाध्यताले सम्हालेको छु ।’–उनले भने ।

आफ्नो वडामा सचिव नभएका कारणले समयमै व्यक्तिगत घटना दर्ता, विभिन्न सिफारिसलगायतका काम आफूले भनेको समयमा गर्न नपाएको र दुःख खेपिरहनु परेको भूमे गाउँपालिका‐४ काँडाका विकास बुढाले गुनासो गरे ।


जयमान बुढा मगर