समाचारहरू

१५ वर्षीया बालिकाको तिरहुत गाउँपालिका–३ का ४३ वर्षीय विनोद शर्मा सुतिहारसँग हुन लागेको बालविवाह स्थानीयवासी र प्रहरीको प्रयासमा माघ ६ गते रोकिएको छ ।

स्थानीयवासीले खबर गरेपछि बालविवाह गर्ने, गराउने कार्यमा संलग्न रहेको आरोपमा प्रहरीले बालिका, उनकी ४५ वर्षीया आमा, आरोपित विनोद र विवाह गराउने कार्यमा संलग्न हनुमाननगर कङ्कालिनी नपा–१४ का ६७ वर्षीय रामेश्वर शर्मा सुतिहारलाई माघ ६ गते गिरफ्तार गरेको वडा अध्यक्ष सत्यनारायण यादवले जानकारी दिनु भयो ।

वडा अध्यक्ष यादवका अनुसार बालविवाह भइरहेको भन्ने सूचनाको आधारमा प्रहरी चौकी रामपुर मल्हनियाबाट खटिएको प्रहरीले उनीहरूलाई गिरफ्तार गरी जिल्ला प्रहरी कार्यालय लगेका हुन् ।

जिल्ला प्रहरी कार्यालयस्थित महिला, बालबालिका तथा ज्येष्ठ नागरिक सेवा केन्द्रमा छलफल गरी आरोपितहरूलाई बालविवाह नगराउने सर्त गरी पठाइएको डिएसपी भुवनेश्वरप्रसाद साहले बताउनु भयो ।

डिएसपी साहका अनुसार विवाहको लागि छलफल गरिरहेका बेला थाहा पाएर प्रहरी कार्यालय ल्याइएका उनीहरूलाई बालविवाहसम्बन्धी कानुनी जानकारी गराएर सम्झाइबुझाई उमेर नपुगी विवाह नगर्ने, नगराउने कागज गराएपछि छाडिएको हो ।

मनोहरकुमार पोखरेल