समाचारहरू

सुनकोशी गाउँपालिका वडा नं. २, ४ ५, ७ का स्थानीय बासिन्दाले स्वतन्त्र नागरिक समाज गठन गर्दै सडक निर्माण कार्य अविलम्ब सुरु गर्न माग राखेर ०७७ माघ १२ सुनकोशी गाउँपालिका घेराउ गर्दै ढुङ्गामुढा गर्दा पालिकाले उपलब्ध गराउने सेवा प्रभावित भएको छ ।

स्थानीयवासीले सिन्धुलीगढी, नागी, मतनवास, बन्दीपुर, काफ्लेचौर, नेत्रकाली, तालढुङ्गा ग्रामीण कृषि सडक निर्माणको काम ढिला भएको र उक्त सडकको ख खण्डको रुट परिवर्तन गरिएको भन्दै विरोध जनाएका हुन् ।

उनीहरूले दिनभर गाउँपालिका कार्यालयको कामकाज समेत ठप्प पारेका हुन् । विरोध प्रदर्शन तथा ढुङ्गामुढा प्रहारबाट कुनै पनि क्षति नभएको पालिकाका अध्यक्ष दीपा बोहोराले बताउनु भयो ।

स्थानीय जनतालाई जानकारी नदिई गरिएको डिपिआर खारेज गर्न र नागरिकलाई पायक पर्ने गरी सडक आयोजना निर्माण गर्न गाउँपालिकामा उनीहरूले माग गरेका छन् ।

स्थानीयले पुस १८ गते १५ दिने अल्टिमेटम सहित दिईएको ज्ञापनपत्रको कार्यान्वयन नभएपछि उनीहरूले विरोध प्रदर्शन गरेका हुन ।

कानुनी परामर्श समिति, संघर्ष समिति र आर्थिक समिति समेत गठन गरी सडकको रुट परिवर्तनको विरोधमा आन्दोलनमा उत्रेको स्थानीयले बताएका छन् । सिमित व्यक्तिको स्वार्थका लागि रोडको रुट फेरिएको र स्थानीय जनताको माग सुनुवाई नभएको साथै स्थानीय सरकारको मिलेमतोमा रुट परिवर्तन भएको भन्दै विरोध प्रदर्शन भएको स्थानीय बुलमान घलानले बताउनु भयो ।

सिन्धुलीगढी, नागी, मतनवास, बन्दीपुर, काफ्लेचौर, नेत्रकाली, तालढुंगासम्म सडक निर्माण हुनुपर्नेमा स्थानीयलाई जानकारी नै नदिई सडक नागी मझुवा गौंखर्क, अमारे, मुलकोट हुँदै दुम्जा लान थालेकोमा विरोध जनाएको घलानले बताउनु भयो ।

भौतिक पूर्वाधार विकास कार्यालय रामेछापले हेर्ने गरी बागमती प्रदेशको भौतिक पूर्वाधार मन्त्रालयको बजेटमा निर्माण हुन थालेको सडकमा स्थानीयहरू असन्तुष्ट देखिएपछि गाउँपालिकाकोले सङ्घर्ष समितिसँग माघ १२ गते नै छलफल गरेको छ ।

उपयुक्त समय मिलाएर भौतिक पूर्वाधार विकास मन्त्री समक्ष गाउँपालिका अध्यक्ष, उपाध्यक्ष, वडा नं. २, ४, ५ र ७ का वडाअध्यक्षहरू तथा स्थानीय सम्मिलित टोलीले डेलिगेशन जाने र सोही अनुसार डिपिआर बनाउन छलफल गर्ने सहमति भएपछि सङ्घर्ष समितिले आन्दोलन स्थगित गरेको छ ।

यसअघि स्थानीयले वडा नं. ७ र ५ को वडा कार्यालयमा तालाबन्दी समेत गरेका थिए ।

बिमला पाण्डे