समाचारहरू

त्रिबेणी नगरपालिका–४ तोलीका स्थानीयहरुले भदौ २२ गते राति गरेको आक्रमणबाट मौरे प्रहरी चौकीका असई रघुविर बडु,  प्रहरी हवल्दार नारदसिंह विष्ट र प्रहरी जवान नरेन्द्र बोहोरा घाइते भएका छन् ।

भदौ २२ गते राति त्रिबेणी नगरपालिका–४ तोलीका नरेन्द्र साउदले मदिरा सेवन गरी स्थानीय बजारमा  होहल्ला गरेको भन्दै प्रहरीलाई निवेदन दिएपछि आरोपितलाई गिरफ्तार गर्न गएको प्रहरी टोलीमाथि स्थानीयले ढुङ्गा प्रहार गरी घाइते बनाएका हुन् ।

तोली स्वास्थ्य चौकीमा आरोपित साउदको मापसे जाँच गरी मौरे प्रहरी चौकी ल्याउने क्रममा स्थानीयहरुले ढुङ्गा प्रहार गर्दा मौरे प्रहरी चौकीका असई रघुविर बुडु, प्रहरी हवल्दार नारदसिंह विष्ट र प्रहरी जवान नरेन्द्र बोहोरा घाइते भएका जिल्ला प्रहरी कार्यालय, बाजुारका इन्स्पेक्टर लोकेन्द्र ठगुन्नाले इन्सेक प्रतिनिधिलाई फोनबाट बताउनु भयो ।

प्रहरी टोलीमाथि आक्रमण गरी घाइते बनाएको आरोपमा त्रिबेणी नगरपालिका–४ तोलीका २८ वर्षीय नरेन्द्र साउद, २५ वर्षीय केशब साउद र २९ वर्षीय गणेश साउदलाई भदौ २३ गते गिरफ्तार गरी अभद्र व्यवहार कसुरमा जिल्ला प्रशासन कार्यालय, बाजुरामा मुद्दा दर्ता गरिएको र फरार रहेका दिल साउद, दल साउद, राम साउद र प्रकाश साउदको खोजी कार्य भइरहेको जिल्ला प्रहरी कार्यलय बाजुराका इन्स्पेक्टर ठगुन्नाले बताउनु भयो ।

स्थानीयहरुको आक्रमणबाट घाइते भएका असई बडुको जिल्ला अस्पताल, बाजुरामा र प्रहरी हवल्दार विष्ट र प्रहरी जवान बोहोराको तोली स्वास्थ्य चौकीमा उपचार भइरहेको प्रहरीले जनाएको छ ।

त्रिवेणी नगरपालिकाले नगरपालिका क्षेत्रलाई मदिरा निषेधित क्षेत्र घोषणा गरेको भएपनि यस नगरपालिका क्षेत्र भित्र मदिरा बिक्री वितरण बन्द भएको छैन् ।

पदमबहादुर सिंह