समाचारहरू

नेपालको संविधान ०७२ को धारा ३४ मा श्रमको हकको व्यवस्था छ । सो धाराको उपधारा २ मा प्रत्येक श्रमिकलाई उचित पारिश्रमिक, सुविधा तथा योगदानमा आधारित सामाजिक सुरक्षाको हक हुने छ भनि उल्लेख गरिएको छ ।

तर, सुनसरी दुहवी नगरपालिका–२ का ४८ वर्षीय खुशियानन्द ढुङ्गेलले पाउनुपर्ने तलब र सेवा सुविधा माग्दा कामबाट निष्काशन हुनु परेको गुनासो गर्नु भएको छ ।

पुस २८ गते विराटनगरमा पत्रकार सम्मेलन गरी ढुङ्गेलले सुनसरीको दुहबी नगरपालिका–२ शुभद्रा चौकस्थित मैनावती स्टिल प्रालिबाट पुस २७ गते आफूलाई उद्योगले कामबाट निकालेको पीडितले आरोप लगाउनु भएको छ ।

एक दशकदेखि सुपरभाईजर पदमा काम गर्दै आएको र उद्योगले तलब तथा सेवासुविधा नदिई अवकाश दिएको पीडितको आरोप छ ।

काम सुरू गरेदेखि ०७५ पुससम्मको सञ्चयकोष, उपदान, ग्रेड, बोनश र तलब गरी ११ लाख ६५ हजार ४ सय ८१ रूपियाँ कम्पनीबाट पाउनुपर्ने उहाँले भनाइ छ ।

काम गर्दै आएको उद्योगले कामबाट निकालेपछि ढुङ्गेलले विराटनगरस्थित श्रम तथा रोजगार कार्यालयमा तलब र सेवासुविधा दिलाई दिन निवेदन दिनु भएको छ ।

श्रम कार्यालय विराटनगरका वरिष्ठ श्रम अधिृकत प्रेमप्रसाद सञ्जेलले ढुङ्गेललाई १० लाख ९७ हजार ४ सय ८१ रूपियाँ उद्योगबाट भराउन गत मङ्सिर ५ गते उद्योगलाई पत्र काटेपनि उद्योगले सो पत्रको कार्यान्यन नगरेको पीडितको आरोप छ ।

 

नेत्र पी अधिकारी