सूचना नहुँदा पाएनन् सामाजिक सुरक्षा भत्ता

  ०७५ फागुन ११ गते

सरकारले उपलब्ध गराउँदै आएको सामाजिक सुरक्षा भत्ताका लागि वर्सेनी बैङ्क खाता नविकरण गर्नुपर्छ भन्ने पूर्ण सूचना नहुँदा ज्येष्ठ नागरिक तथा लक्षित समुदाय भत्ता पाउनबाटै वञ्चित भएका छन् ।

गएको चौमासिकमा इलाम नगरपालिकामा मात्र सामाजिक सुरक्षा भत्ताका लागि आएको १५ लाख रुपियाँ खर्च नभएको पाइएको नगरपालिकास्थित न्यायिक समिति संयोजक तथा नगरपालिका उप–प्रमुख सुशीला नेम्वाङले बताइन् ।

गएको चौमासिक अर्थात चालू आर्थिक वर्षको साउनदेखि कात्तिकसम्मको अवधिमा ३ हजार ५ सय ६० जनालाई आएको २ करोड १८ लाख ९७ हजार ४ सय रुपियाँमा २ करोड ३ लाख ४६ हजार रुपियाँमात्र खर्च भएको नेम्वाङले जानकारी दिइन् ।

ज्येष्ठ नागरिक, लोपोन्मुख, एकल महिला, अपाङ्गता भएका व्यक्तिलगायतका लागि आएको सामाजिक सुरक्षा भत्तालाई बैङ्क खातामार्फत निकासी गर्ने गरिएको छ ।

‘तर सबैलाई वर्सेनी बैङ्क खाता नविकरण गर्नुपर्छ भन्ने जानकारी नभएको पाइएकाले समस्या आएको छ ।’–नेम्वाङले भनिन्–‘कसैको मृत्यु भएको हुन सक्छ । कसैले विवाह गरेको हुनसक्छ । कसैले ठाउँ नै छोडेर गएको हुनसक्छ । त्यही कारणले बैङ्क खातालाई नविकरण पनि अनिवार्य गरिएको हो ।’

नेम्वाङका अनुसार गएको चौमासिकमा इलाम नगरपालिका–८ का मात्रै ८० जनाले सामाजिक सुरक्षा भत्ता पाउन सकेका छैनन् ।

नगरका अन्य वडामा पनि यो समस्या रहेको जनाइएको छ । सरकारले ७० वर्षमाथिका ज्येष्ठ नागरिकलाई २ हजार रुपियाँ उपचार खर्च सहित अन्यलाई समेत मासिक १ हजार रुपियाँका दरले चौमासिक रूपमा सामाजिक सुरक्षा भत्ता उपलब्ध गराउँदै आएको छ ।


कोकिला ढकाल