सुरक्षित प्रसूति केन्द्र सञ्चालन नहुँदा गर्भवती महिलालाई समस्या

  ०७६ असोज २७ गते

महाकाली नगरपालिका–९ दत्तु स्वास्थ्य चौकीमा भवन अभावका कारण सुरक्षित प्रसूति केन्द्र सञ्चालन हुन नसक्दा गर्भवती महिलाहरूले समस्या झेल्नु परेको छ ।

सुरक्षित प्रसूति केन्द्र स्थापनाको लागि सामग्री र जनशक्तिको व्यवस्थापन गरिएको भएपनि भवन अभावले सञ्चालनमा आउन नसकेको अनमी गौरी सामन्तले बताइन् ।

उनले भनिन्–‘स्वास्थ्य चौकीमा बर्थिङ सेन्टरको लागि चाहिने सामग्री छ । तर, अहिलेसम्म भवन अभाव भएका कराण प्रयोगमा आउन सकेको छैन ।’

‘गत वर्षको बजेटमार्फत एक कोठा थप गरिएको छ । सो भवन प्रयोगमा ल्याए मात्रै पनि सुरक्षित प्रसूति केन्द्र सञ्चालनमा आउँछ ।’–उनले भनिन् ।

अहिले स्वास्थ्य चौकीको प्रशासनलाई माथिल्लो तलामा सारेर तल्लो तलामा सुरक्षित प्रसूति केन्द्र बनाउने तयारी भएको छ ।

सडकसँग जोडिएका गाउँका महिलाहरूलाई गर्भवती हुँदा जिल्ला आउन सजिलो भएपनि सडक नपुगेको थाप्लालगायतका बस्तीका महिलाहरूलाई आवतजावतमा समस्या हुने गरेको स्थानीय लीला चैसिरले बताइन् ।

उनले भनिन्–‘दत्तुमा प्रसूति केन्द्र सञ्चालनमा नआएका कारण दार्चुला सदरमुकाम जानुभन्दा भारतीय बजार पुर्‍याउन बाध्य भएका छौँ । गाउँमै सुरक्षित प्रसूति केन्द्र भएको भए गर्भवती महिलालाई समस्या हुने थिएन ।’

अहिलेसम्म भवन अभावले सञ्चालनमा ल्याउन नसकिएको अहेव सुरेश राम दमाईले बताए । ‘बर्थिङ सेन्टरको लागि आएको सामग्री त्यतिकै राखिएको छ । अहिले भवन निर्माण भएको छ । हामी छिट्टै सञ्चालनमा ल्याउने तयारीमा छौँ ।’–उनले भने ।

दत्तुमा सुरक्षित प्रसूति केन्द्र नहुँदा गर्भवती महिलाहरूले सदरमुकाम खलङ्गा आउनु पर्ने बाध्यता रहेको अनमी पार्वती जोशीले सुनाइन् ।

उनले भनिन्–‘दुई जना अनमी छौँ । सुरक्षित प्रसूति केन्द्र सञ्चालन नहुँदा महिनामा ५÷६ जना महिला सुत्केरीका लागि जिल्ला अस्पताल पठाउनु परेको छ ।’

भवन निर्माणको लागि वडा कार्यालय दत्तुले ६ लाख ५० हजार रुपियाँ छुट्याएको वडा अध्यक्ष हरसिंह डागाले जानकारी दिए ।

गुड नेभर इन्टरनेशनल नामक गैरसरकारी संस्थाको सहयोगी संस्था सङ्कल्प दार्चुलामार्फत दत्तु स्वास्थ्य चौकीमा सुरक्षित प्रसूति केन्द्र स्थापनाको लागि सामग्री सहयोग भएको छ ।


नरेन्द्रसिंह कार्की