सिलिण्डर विष्फोटमा संलग्नताको आरोपमा एक विद्यार्थी गिरफ्तार

  ०७६ असार ११ गते

सिलिण्डर विष्फोटको अनुसन्धान गर्न भन्दै प्रहरीले सल्यानमा कक्षा ९ मा पढ्ने एक विद्यार्थीलार्इ गिरफ्तार गरेको छ ।

विप्लव नेतृत्वको नेकपाको बन्दको अघिल्लो दिन असार ९ गते सोमबार राति सल्यानको कुमाख गाउँपालिका-६ वडागाउँमा सिलिण्डर विष्फोट भएको थियो ।

सोही घटनामा संलग्न भएको आशङ्कामा प्रहरीले कुमाख गाउँपालिका-६ वडागाउँका १६ वर्षीय पुष्कर सुनारलाई असार ११ गते बिहान गिरफ्तार गरेको हो ।

उनलाई घटनामा संलग्नताको विषयमा सोधपुछका लागि गिरफ्तार गरिएको जिल्ला प्रहरी कार्यालयका डिएसपी वीरेन्द्रबहादुर शाहीले बताए ।

'अहिलेलाई सोधपुछका लागि गिरफ्तार गरेका हौँ ।'-उनले भने-'यदि घटनामा संलग्नता भएको र थप अनुसन्धान गर्नुपर्ने देखिएमा कानुन बमोजिम गर्छौँ ।'

इलाका प्रहरी कार्यालय रागेचौरको टोलीले गिरफ्तार गरेपछि उनलाई अहिले जिल्ला प्रहरी कार्यालय सल्यानमा ल्याइएको छ । उनलाई प्रहरीले घरबाट गिरफ्तार गरेको परिवारले जनाएको छ ।


मिना बुढाथोकी