सिमाङ्कन विरूद्ध भएको आन्दोलनका घाइतेहरूलाई इन्सेकद्वारा सहयोग प्रदान

  ०७६ वैशाख २३ गते

०७२ साउनमा सुर्खेतमा भएको सिमाङ्कन विरूद्धको आन्दोलनको क्रममा घाइते भएका तीनजनालाई इन्सेक कर्णाली प्रदेश कार्यालय, सुर्खेतले वैशाख २३ गते यातायात तथा समन्वय खर्चबापत सहयोग प्रदान गरेको छ ।

आन्दोलनमा घाइते भएका वीरेन्द्रनगर नपा–६ का २२ वर्षीय अनिश पन्त, २९ वर्षीय रामबहादुर श्रेष्ठ र दैलेख नौमुले गाउँपालिका–५ का २८ वर्षीय नरबहादुर पुरीलाई इन्सेकले प्रदेश कार्यालय, सुर्खेतमा एक कार्यक्रमको आयोजना गरी वैशाख २३ गते प्रतिव्यक्ति १०-१० हजार रुपियाँ नगद सहयोग प्रदान गरेको हो ।

पन्ध्रदिन सम्म भएको सो आन्दोलनको क्रममा ०७२ साउन २५ गते प्रहरीको गोलीबाट घाइते भएका पन्त, श्रेष्ठ र पुरीको काठमाडाँैमा उपचार गरिएको थियो ।

गृह मन्त्रालयले घाइते तीनैजनाको उपचार खर्च दिएपनि सुर्खेतमा उपचार हुन नसकी थप उपचारका लागि सुर्खेतदेखि नेपालगञ्ज र नेपालगञ्जबाट काठमाडौँ लैजाँदा लागेको जहाज भाडा बापतको ३ लाख ६६ हजार रुपियाँ हालसम्म नदिएको पीडित रामबहादुर श्रेष्ठले बताए ।

सिमाङ्कन विरूद्धको आन्दोलनमा घाइते भएका पन्त, श्रेष्ठ र पुरीलाई थप उपचार तथा राहत उपलब्धताको लागि सङ्घीय सरकार र प्रदेश सरकारसम्म पुग्न लाग्ने यातायात खर्च तथा समन्वयका लागि सहयोग स्वरूप सो रकम प्रदान गरिएको इन्सेक कर्णाली प्रदेश कार्यालय, सुर्खेतका संयोजक नारायण सुवेदीले जानकारी दिए ।

Photo20190506Surkhet02


दुर्गा थापा