सिंचाई विकास डिभिजन कार्यालय प्रमुखलाई मोसो दलेर दुर्व्यवहार

  ०७६ असार १३ गते

सिंचाइ विकास डिभिजन कार्यालय कञ्चनपुरका प्रमुख अजितकुमार श्रीवास्तवलाई असार १२ गते सत्तारुढ नेकपा समर्थित युवाहरूले कार्यालयमै मोसो दलेर दुर्व्यवहार गरेका छन् ।

अख्तियार दुरुपयोग अनुसन्धान आयोग कञ्चनपुरको टोलीले श्रीवास्तवलाई कार्यालयबाटै असार १२ गते दिउँसो गिरफ्तार गरेको थियो । गिरफ्तार भएका श्रीवास्तवलाई नेकपा समर्थित युवाहरूले कार्यालयमै मोसो दलेका थिए ।

श्रीवास्तवले भीमदत्त नगरपालिकामा पर्ने चौधर नदीको तटबन्ध निर्माणको भुक्तानी दिने क्रममा २ लाख रुपियाँ कमिशन माग गरेको आरोपमा गिरफ्तारीमा परेका थिए ।

उनले कमिशन बापत लिएको २ लाख रुपियाँ घूस रकम भान्सामा रहेको चामलको बोरामा लुकाएर राखेको अवस्थामा अख्तियार दुरुपयोग अनुसन्धान आयोग कञ्चनपुरले फेला पारेको जनाएको छ ।


कोमलनिरन्जन भाट