सासूको हत्या गरेको आरोपमा बुहारी गिरफ्तार

  ०७६ असोज १७ गते

खाँडादेवी गाउँपालिका–४ तल्लोटारीकी ७२ वर्षीया सासू काली गिरीको हत्या गरेको आरोपमा प्रहरीले सोही ठाउँ बस्ने २५ वर्षीया बुहारी निर्मला गिरीलाई असोज १५ गते गिरफ्तार गरेको छ ।

तीन वर्षदेखि बिरामी भएर घरमा थला परेकी कालीको असोज १४ गते मृत्यु भएको र मृतकको घाँटीमा निलडाम देखिएपछि मृतकका आफन्तले बुहारीले नै सासूको हत्या गरेको आशङ्का गर्दै आरोपित निर्मलाविरूद्ध असोज १५ गते जिल्ला प्रहरी कार्यालयमा उजुरी दिएको उक्त कार्यालयका डिएसपी सन्तोष भट्टराईले बताए ।

सोही दिन गिरफ्तारीमा परेकी आरोपित निर्मलाले अनुसन्धानको क्रममा आफूले नै सासूको घाँटी थिचेर हत्या गरेको स्वीकारेको डिएसपी भट्टराईले बताए ।

शवको पोष्टमार्टमका लागि असोज १५ गते नै त्रिवि शिक्षण अस्पताल काठमाडौँ पठाइएको प्रहरीले जनायो ।


नवराज पथिक