सामाजिक सुरक्षा भत्ता पाउनबाट वञ्चित

  ०७३ असोज २४ गते

दार्चुलामा यसवर्षपहिलो चौमासिकको सामाजिक सुरक्षा भत्ता पाउनबाट लक्षित समुदायका नागरिक वञ्चित भएका छन् ।

स्थानीय विकास अधिकारी सहदेव रायमाझी रकम निकासा नगरी जिल्ला छोडेपछि सामाजिक सुरक्षा भत्ता पाउनबाट लक्षित समुदायका नागरिक वञ्चित भएका हुन् ।

मन्त्रालयले दसैँमा समेत जिल्ला नछोड्न गरेको निर्देशनको अवज्ञा गर्दै स्थानीय विकास अधिकारी रायमाझी असोज १३ गते नै जिल्ला छाडेर गएपछि यहाँका १२ हजार ८ सय ६० जना लक्षित समुदायका नागरिक सामाजिक सुरक्षा भत्ता पाउनबाट वञ्चित भएका हुन् ।

जिल्ला विकास समिति दार्चुलाका सूचना अधिकारी युवराज जोशीका अनुसार सामाजिक सुरक्षा भत्ता पाउने लक्षित समुदाय अन्तर्गत ज्येष्ठ नागरिक दलित १ हजार २ सय ६१ जना, ज्येष्ठ नागरिक औषधि उपचार खर्च पाउनेसहित ५ हजार ७९ जना, एकल महिला १ सय २० जना, विधुवा महिला ३ हजार २ सय ५१ जना, पूर्ण अपाङ्ग २ सय २९ जना, आंशिक अपाङ्ग २ सय ५४ जना, लोपोन्मुख राउटे १८ जना र दलित बालबालिका २ हजार ६ सय ४८ जना रहेका छन् ।

'यस वर्षबढेको सामाजिक सुरक्षा भत्ताबाट एकजोर लत्ताकपडा र खाद्यान्न जोहो गर्ने सोचेका थियौं ।'-सितोला-१ का ज्येष्ठ नागरिक थोले टमटाले भने-'गाविस सचिवले सामाजिक सुरक्षा भत्ता नआएको जानकारी गराएपछि निराश भएका छौ ।' यस वर्षदसैँ तिहार कसरी मनाउने भन्ने चिन्ता बढेको समेत टमटाले दुखेसो पोखे । 'यस वर्षदसैँ खल्लो भयो ।'-उनले भने ।

दसैँ अघि नै सामाजिक सुरक्षा भत्ता वितरण गर्नुपर्ने भएपनि जिल्ला विकास समितिको लापारबाहीको कारण सामाजिक सुरक्षा भत्ता पाउन नसकेको ज्येष्ठ नागरिकहरूले गुनासो गरेका छन् । जिल्ला विकास समितिबाटै निकासा नगरिदिँदा सामाजिक सुरक्षा भत्ता वितरण गर्न नसकिएको लाली गाविस सचिव नारायणदत्त भट्टले बताए । रकम निकासा नगरिकनै जिल्ला विकास समितिका लेखा कर्मचारी र स्थानीय विकास अधिकारी घर बिदामा गइसकेको समेत सचिवले जानकारी गराए ।

जिल्ला विकास समिति दार्चुलाका लेखापाल टिकेन्द्र जोशीले भने सामाजिक सुरक्षा भत्ता वापतको वितरण गर्नुपर्ने रकमको अख्तियारी ढिलो आएको कारण निकासा पठाउन नसकिएको बताए । 'केही दिन अघि निकासा आएको छ ।'-उनले भने-'निकासा गर्नमा ढिलाई भएकै हो ।'


नरेन्द्रसिंह कार्की