साढे तीन महिनादेखि तीन विषयको पठनपाठन नभएको विद्यार्थीको गुनासो

  ०७५ माघ १५ गते

कुमाख गाउँपालिकास्थित बुद्घ जनकल्याण माविमा विगत साढे तीन महिनादेखि विषयगत शिक्षक नहुंँदा पठनपाठनमा समस्या भएको विद्यार्थीहरूले गुनासो गरेका छन् ।

कात्तिक महिनादेखि कक्षा नौ र कक्षा १० को विज्ञान विषयको पढाई ठप्प हुँदा पठनपाठनमा समस्या भएको कक्षा १० मा अध्ययनरत छात्र विनोद बुढाथोकीले बताए । साढे तीन महिना बितिसक्दा समेत शिक्षकको पदपूर्ति नहुँदा विज्ञान विषयको कोर्ष अधुरै रहेको उनले गुनासो गरे ।

यस्तै आठ कक्षाको विज्ञान, गणित र पेशा व्यवसाय (नयाँ कोर्ष) विषयको कोर्ष पनि साढे तीन महिनादेखि बन्द भएको कक्षा आठमा अध्ययनरत छात्र दीपक केसीले जानकारी दिएका छन् ।

विगत चार महिनादेखि शिक्षक सरुवा भएर गएको र कोही घर विदामा गएका शिक्षक पनि नफर्किएपछि ती विषयको अध्ययन गर्न समस्या भएको उनले गुनासो गरेका हुन ।

विद्यार्थी शिक्षाको अधिकारबाट वञ्चित हुँदासमेत सरोकारवालाले ध्यान नदिँदा विद्यार्थीले माघ १४ गते विद्यालयमा तालाबन्दी गरेका छन् ।

वार्षिक परीक्षा आउन केही महिनामात्रै बाँकी रहँदासमेत विद्यालयले विषयगत शिक्षकको विकल्प नखोजेको भन्दै तालाबन्दी गर्नु परेको कक्षा नौ मा अध्यनरत छात्र युवराज खड्काले जानकारी दिए ।

‘हामीले विद्यालयका प्रधानाध्यापक तथा विद्यालय व्यवस्थापन समितिसँग पटकपटक पढाई सञ्चालन गर्न शिक्षकको माग ग¥यौँ । तर, अहिलेसम्म पनि सुनुवाइ भएन ।’–उनले भने–‘हामीले पढ्न पाउने अधिकारबाटै वञ्चित हुनुपर्दा समेत कसैले वास्ता गरेनन् । त्यसैले बाध्य भएर विद्यालयमा तालाबन्दी गरेका हौँ ।’

विद्यालयमा तत्काल शिक्षकको पदपूर्ति गर्नुपर्ने र सबै विषयको नियमित कक्षा सञ्चालन गर्ने लिखित सहमति नहुँदासम्म तालाबन्दी नखोलिने लगायतका नौ बुँदे माग आफूहरूको रहेको खड्काले जानकारी दिए ।

गाउँ शिक्षा इकाई प्रमुख तुल्सी शर्माले एक हप्ताभित्र परीक्षा गराई विषयगत शिक्षक ल्याउने तयारी भइरहेको बताए ।


मिना बुढाथोकी