समाचारहरू

निर्वाचन आयोगले निर्वाचन प्रचारप्रसारका क्रममा सहिदका फोटो एवम् भिडियो देखाएर मत नमाग्न राजनीतिक दल तथा उम्मेदवारहरूलाई निर्देशन दिएको छ ।

मङ्सिर १५ गते आयोगले प्रदेश नम्बर २ का विभिन्न निर्वाचन क्षेत्रमा सहिदका फोटो एवम् भिडियो सामग्रीलाई चुनावी प्रचारका सामग्री बनाइएको भन्दै त्यस्तो कार्य नगर्न राजनीतिक दल तथा उम्मेदवारलाई सचेत गराएको आयोगका सहसचिव एवम् प्रवक्ता नवराज ढकालले बताए ।

आयोगको निर्देशन उल्लङ्घन गर्नेलाई तत्काल कारबाही गर्न सम्बन्धित निकायलाईसमेत आयोगले निर्देशन दिएको छ । विभिन्न समयमा भएका आन्दोलनका ध्वनि, दृश्य तथा तस्विरलाई सामाजिक सञ्जाल र सञ्चार माध्यमहरूमार्फत भोट माग्ने प्रचार सामग्रीका रूपमा प्रयोग गरिएको पाइएकाले यस्तो निर्देशन दिनुपरेको आयोगले जनाएको छ ।

त्यस्ता कार्यले निर्वाचन आचारसंहिता उल्लङ्घन हुनुका साथै सहिदहरूको सम्मानमा आघात पर्ने भएकोले तत्काल हटाउन निर्देशन दिइएको जनाइएको छ । राजनीतिक दल तथा उम्मेदवारले त्यस्ता सामग्रीलाई अटेर गरेर नहटाए आफैँ हटाउन सम्बन्धित जिल्ला प्रशासन कार्यालय, निर्वाचन आयोगका कार्यालय, सुरक्षा निकाय र अनुगमतकर्तालाई निर्देशन दिइएको ढकालले बताए ।

सुभाष साह