सरकारी कार्यालयमा कर्मचारीको अभावले सेवाग्राहीलाई सास्ती

  ०७३ कात्तिक २४ गते

दसैँ तिहार विदामा घर गएका अछामका सरकारी कार्यालयका प्रमुख र कर्मचारीहरू कार्यालयमा कात्तिक २३ गतेसम्म नफर्कँदा सेवाग्राहीले सास्ती पाएको गुनासो गरेका छन् । जिल्लाका विभिन्न ठाउँबाट सरकारी सेवा लिन सदरमुकाम मङ्गलसेन आएका सेवाग्राहीले कार्यालय प्रमुख तथा फाँटवाला कर्मचारी नहुँदा प्रशासनिक काम नभएर त्यसै फर्कनु परेको गुनासो गरेका हुन् ।

जिल्ला विकास समिति, जिल्ला शिक्षा, जिल्ला वन, जिल्ला कृषि, जिल्ला भूसंरक्षण र नापी कार्यालयका प्रमुख विहीन भएका छन् । स्थानीय तह पुनर्संरचनाको खाका बुझाउन गएका स्थानीय विकास अधिकारी बाहेक सबै प्रमुखहरू दसैँ अघि विदामा गएका हुन् । यस्तै विदामा गएका जिल्लाका अधिकाँश सरकारी कार्यालयमा कार्यरत फाँटवाला र अन्य कर्मचारी कार्यालयमा नभेटिने गरेको पत्रकार नरेश शाहीले बताए ।

कार्यालय प्रमुख हाजिर नुहँदा सम्म कार्यालय निमित्तको भरमा काम भइरहेको र बाँकी रहेका कर्मचारी पनि चाँडै आउने सहायक प्रमुख जिल्ला अधिकारी आनन्द शर्मा भुसालले बताए ।


शिवराज ढुङ्गाना