समान कामको समान ज्याला नपाएको महिलाको गुनासो

  २०७७ माघ १२ गते

तिला गाउँपालिका–५ डुङ्ग्री गाउँका महिलाले डुङग्री गाउँको प्राथमिक विद्यालयमा दिनभर घेरवार निर्माण गर्दा समान कामको समान ज्याला नपाएको गुनासो गरेका छन् ।

विद्यालयको घेरवार निमार्णको लागि दिनभर ढुङ्गा, बालुवा र माटो बोक्ने काम महिला र पुरुष दुबैले समान काम गरेका हुन् । तर महिलालाई प्रतिदिनको ज्याला ५ सय र पुरुषलाई ८ सय रुपियाँ दिएको स्थानीय बाँचु रावतले गुनासो गर्नुभयो । उहाँले भन्नुभयो महिला पुरुषले समान काम गर्दा समान ज्याला नपाउनु दुःखको अनुभूति भयो । अहिले पनि महिला पुरुष बीच विभेद कायम रहेको छ ।

धेरैजसो महिलालाई आफूले पाउने ज्यालाको बारेमा जानकारी नै दिदैनन् । काम मात्रै गराउने गरेको दिलमाया थापाले बताउनुभयो । उहाँले भन्नुभयो, हामीले पनि पुरुष बराबरको ज्याला पाउनु पर्छ भन्ने हो । तर महिलालाई पुरुषले दिदैनन् । महिला पुरुष समान हुन् भन्ने जानकारी हुँदा पनि कार्यान्वयन नहुने गरेको सरस्वती रावतले बताउनुभयो ।

तिला गाउँपालिका–५ का वडाध्यक्ष कालीबहादुर बुढाले यो विषयमा आफूलाई जानकारी नभएको बताउनुभयो । उहाँले भन्नुभयो, यस सम्बन्धमा घेरवार निर्माण उपभोक्ता समितिका पदाधिकारी र गाउँका अगुवासँग बसेर छलफल गर्नेछौँ, । यस विषयमा जानकारी दिनु भयो वडा कार्यालयको ध्यानाकर्षण भएको छ । उहाँले भन्नु भयो “अहिलेको युगमा महिलाले समान कामको समान ज्याला नपाउनु अन्याय हो ।”
2020-01-25 Jumla


मानदत्त रावल