समाचार सङ्कलनमा खटिएका पत्रकारलाई प्रहरीद्वारा दुर्व्यवहार

  ०७५ पुस १५ गते

नेपाल टेलिभिजनका संवादाता भीमदत्तनगरपालिका–४ का पदम बोहरालाई नगरविकास समिति अवैध लिज प्रकरणको समाचार सङ्कलन गर्न गएको समयमा पुस १३ गते प्रहरीले कुटपिट तथा दुव्र्यवहार गरेको पीडितको आरोप छ ।

पत्रकार पदम बोहरालाई वडा प्रहरी कार्यालय महेन्द्रनगरबाट गएको प्रहरीले फोटो किन खिचिरहेको भन्दै कुटपिटका साथै गालीगलौज गरेको पीडित बोहराले बताए ।

बोहराले आफू समाचार सङ्कलन गर्न गएका बेला प्रहरीको बारेमा को हो फोटो खिच्ने र कुराकानी गर्ने भन्दै वडा प्रहरी कार्यालयबाट आएको प्रहरीको टोलीले कुटपिट गर्दै वडा प्रहरी कार्यालयमा थुनेको बताए ।

वडा प्रहरी कार्यालय महेन्द्रनगरका इन्स्पेक्टर सुर्य थापाले प्रहरीसँग विवाद गरेकाले गिरफ्तार गरेको बताए ।

पत्रकार महासङ्घ जिल्ला शाखा कञ्चनपुर र नेपाल प्रेस युनियनले पत्रकार बोहरामाथि भएको कुटपिट, दुर्व्यवहार घटनाप्रति आपत्ति जनाएको छ ।


कोमलनिरन्जन भाट