सङ्खुवासभाका १० ओटा मतदानस्थल संवेदनशील

  ०७६ कात्तिक २२ गते

मङ्सिर १४ गते हुने स्थानीय तहको उप निर्वाचनका लागि सङ्खवासभाका दुई स्थानीय तहमा तोकिएका ११ ओटा मतदानस्थलमध्ये सुरक्षा संवेदनशिलताको हिसाबले १० ओटा मतदानस्थललाई संवेदनशील मानिएको छ । जिल्ला सुरक्षा समितिले ती मतदान स्थललाई संवेदनशील मतदानस्थल भनी विश्लेषण गरेको हो ।

सङ्खुवासभाका प्रमुख जिल्ला अधिकारी जीवनप्रसाद दुलालका अनुसार एक ओटा मतदानस्थलको दुई मतदान केन्द्रलाई मात्रै सामान्य संवेदनशीलको सूचीमा राखिएको छ ।

संवेदनशील मतदानस्थलमा ९ हजार १ सय जना मतदाता रहेका छन् भने १३ ओटा मतदान केन्द्र रहने छन् ।

सङ्खुवासभामा मकालु गाउँपालिकाको अध्यक्ष र खाँदबारी नगरपालिका वडा–३ को वडाध्यक्षका लागि उपनिर्वाचन हुनेछ ।

उपनिर्वाचन हुने मकालु गाउँपालिकामा ९ हजार १ सय जना र खाँदबारी नगरपालिका वडा–३ मा १ हजार ८ सय २२ जना मतदाता रहेका छन् ।

मतदान केन्द्रलाई दुई भागमा विभाजन गरी सुरक्षा व्यवस्था मिलाइएको सिडिओ दुलालले बताए । सिडिओ दुलालले भने–‘संवेदनशील मतदान स्थल तथा केन्द्रको सुरक्षा चुनौती हेरेर सोहीअनुसार सुरक्षाकर्मी परिचालन गछौँ ।’

भौगोलिक विकटता, दलीय होडबाजी, दलीय विभाजनको वैमनस्यता र यसअघिका निर्वाचनमा देखिएका घटनालाई हेरेर संवेदनशील र सामान्य गरी मतदानस्थल तथा केन्द्र छुट्याइएको प्रशासनको भनाई छ ।


बाबुराम बास्तोला