संविधान संशोधन प्रस्तावको विरोधमा विपक्षी दलका सांसदद्वारा संसद अवरोध

  ०७३ मङ्सिर १६ गते

सरकारले संसदमा दर्ता गरेको संविधान संशोधन प्रस्तावको विरोधमा विपक्षी दलहरूले संसद अवरूद्ध गरेका छन् ।

प्रमुख प्रतिपक्षी दल नेकपा एमाले, नेकपा माले, नेमकिपालगायतका दलहरूले संशोधन प्रस्ताव देशलाई विखण्डनको बाटोमा लैजाने भन्दै व्यवस्थापिका संसदको मङ्सिर १६ गतेको बैठक अवरूद्ध गरेका हुन् ।

संसद बैठक सुरू हुनासाथ बैठकमा बोल्दै नेकपा एमालेका उपाध्यक्ष तथा सांसद बामदेव गौतमले संविधान संशोधन प्रस्तावको विरोध गर्दै मुलुकलाई अलग गर्ने गरी ल्याइएको संशोधन प्रस्ताव मान्य नहुने बताए । सांसद गौतमले नयाँ संविधानको कार्यान्वयन र मुलुकमा निर्वाचन गनुपर्ने अवस्थामा सरकारले संशोधन प्रस्ताव दर्ता गराई देशलाई अन्य दिशातर्फमोड्न खाजेको आरोप लगाए ।

संसद गौतमको भनाइसँगै एमाले र अन्य दलका सांसदहरूले आ-आफ्नो ठाँउमा उठेर संविधान संशोधन प्रस्तावको विरोध गरेका थिए । विरोधपछि सभामुख ओनसरी घर्तीमगरले मङ्सिर १७ गते ३ बजेसम्मका लागि संसद बैठक स्थगित गरिएको बताइन् ।

संविधान संशोधन हुनुपर्ने माग गर्दै आन्दोलनरत मधेसी मोर्चाको माग सम्बोधन गर्ने भन्दै सरकारले मङ्सिर १४ गते संशोधन प्रस्ताव संसदमा दर्ता गरेको थियो । तर, उक्त संशोधन प्रस्तावले आफ्ना माग सम्बोधन नहुने भन्दै मोर्चाले पनि विरोध गरेको छ ।

यसैगरी प्रधानमन्त्री पुष्पकमल दाहाल र मधेसी मोर्चाका नेताहरूबिच मङ्सिर १६ गते बसेको बैठकमा मोर्चाका नेताहरूले सहमतिविना ल्याएको संशोधन प्रस्ताव मान्य नहुने र उक्त प्रस्तावले मधेसको माग सम्बोधन नहुने बताए ।


विवेक ढुङ्गाना