श्रम सम्झौता नगर्दा मानव अधिकार उल्लङ्घन: शर्मा

  ०७४ पुस ३ गते

राष्ट्रिय मानव अधिकार आयोगका अध्यक्ष अनूपराज शर्माले वैदेशिक रोजगारमा जाने मुलुकसँग सम्झौता नगर्नाले श्रमिकको मानव अधिकार हनन् भएको बताएका समाचार राससले जनाएको छ ।

आयोगले ललितपुरमा मङ्सिर ३ गते आयोजना गरेको ‘सुरक्षित वैदेशिक रोजगारमा सरोकारवालाको प्रभावकारी भूमिका विषयक अन्तरक्रियामा उनले सरकारकै कारण वैदेशिक रोजगारमा जाने श्रमिकको मानव अधिकार हनन् भएको आरोप लगाएका हुन् ।

“अहिले पनि मलेसिया, साउदी अरबलगायत केही देशसँग कामदार पठाउने बारेमा सम्झौता गरिएको छैन”-उनले भने-“त्यसैले ती मुलुकमा बढी मानव अधिकार उल्लङ्घन भएका छन् ।”

अध्यक्ष शर्माले सम्झौता गरेर मात्र श्रमिकलाई पठाउँदा अधिकार पाउने बताउँदै धेरै जनशक्ति जाने मुलुकमा सरकारले चाँडै नै श्रम सम्झौता गर्नुपर्ने आवश्यकता औँल्याए ।

श्रम तथा रोजगार मन्त्रालयका सचिव लक्ष्मीप्रसाद मैनालीले वैदेशिक रोजगारमा जाने श्रमिकका विषयमा नीतिगत सुधार गर्न लागि परेको बताए । “वैदेशिक रोजगारमा जानेको मानव अधिकार उल्लङ्घनसम्बन्धी कुरालाई अन्तर्राष्ट्रियस्तरमा उठाएर समाधान गर्नुपर्दछ ।”-उनले भने ।

आयोगका सदस्य सुदीप पाठकले सरकारले घरेलु कामदारसम्बन्धी सन्धिलाई लागू गरे श्रमिक सुरक्षित हुने बताउँदै सरकारले अनुगमन नगर्दा वैदेशिक रोजगारमा जाने श्रमिक ठगिने गरेको धारणा व्यक्त गरे ।


अनलाइन डेस्क