शैक्षिक सत्र सुरू भएको पाँच महिना सकिँदासम्म पनि पाठ्यपुस्तक अभाव

  ०७३ असोज १ गते

शैक्षिक सत्र सुरू भएको पाँच महिना बितेपनि जिल्लाका विभिन्न विद्यालयमा पाठ्यपुस्तक अझै पुग्न सकेको छैन् ।

विद्यालयमा पाठयपुस्तक नपुग्दा पठनपाठनबाट विद्यार्थी वञ्चित भएका छन् । रोल्पाको अरेस गाविस–५ स्थित अरेस माविमा कक्षा ९ को भूगोल विषयको पाठ्यपुस्तक भदौ ३० गतेसम्म पुग्न नसक्दा विद्यार्थीहरूले अध्ययन गर्न पाएका छैनन् ।

हालसम्म पुस्तक नआएकाले त्यसभित्र के–के पाठ समावेश छन् भन्ने कुनै जानकारी नभएको कक्षा ९ मा अध्ययनरत विद्यार्थी खोपीराम सुवेदीले गुनासो गरे । हालसम्म पुस्तक हेर्न नपाउँदा अर्धवार्षिक परीक्षामा के लेख्ने भन्ने अन्यौल भएको उनले बताए ।

यस्तै जेदबाङ गाविस–८ स्थित नेपाल राष्ट्रिय माविमा पनि हालसम्म जनसङ्ख्या शिक्षाको पुस्तक पुग्न सकेको छैन । यस वर्षदेखि विद्यालयमा नयाँ ऐच्छिक विषयको रूपमा थप गरिएको जनसङ्ख्या शिक्षाको पुस्तक कतै नपाइएपछि पठनपाठनमा समस्या भएको शिक्षक कुलमान पुनले बताए । ‘यस वर्ष नयाँ ऐच्छिक विषय थप गरेको र पुस्तक नपाएपछि समस्या भएको छ ।’–शिक्षक पुनले भने ।

जिल्ला शिक्षा अधिकारी चिरञ्जीवि पौडेलले पाठयपुस्तकको अभाव केन्द्रकै समस्या भएको बताए । रोल्पामा मात्रै नभएर अन्य जिल्लामा पनि यस्तै समस्या भएको उनले बताए ।


माधवकुमार ओली